Nimin (4.12.19) khan Chief Minister Pu Zoramthanga chuan Railways leh Commerce & Industry Minister Pu Piyush Goyal chu a pisaah kawmin Mizoram mamawh hrang hrang a sawipui.

Chief Minister chuan Bairabi atanga Sairang thleng tur Rel kawng siam mek chu tihpuitlin thuai a tul thu Railways Minister hi hrilhin, ani chuan kum 2022 ah chuan zawh hman ngei tum a nih thu a sawi a. Chak zawka hnathawh a nih theih nan rel siam hna thawktute leh state sorkar chu ngun zawka inhmukhawm thin turin leh harsatna awm theite pawh sawiho thin turin a chah bawk.

Zokhawthar Land Custom Station chu thuam that a tul thu leh Tiau luia Bailey Bridge chu RCC bridge a thlak a tul thu Chief Minister chuan a sawi bawk a. Land Custom Station chu Kawrpuichhuah (Tlabung) leh Zorinpuiah changtlung tak din a tul thu Union Minister hi hrilh bawkin, Mizorama bungraw lakluh leh thawn chhuah nasa takin a tiawlsam phah tur thu te an sawi dun a. Union Minister chuan CM Pu Zoramthanga thu thlen te chu sorkar laipui pawhin a ngaihpawimawh thu leh a lo bawhzui zel tur thu a hrilh a ni.

Chief Minister hi Planning Board Vice Chairman Pu H. Rammawi, Chief Secretary Pu Lalnunmawia Chuaungo, Delhi Resident Commissioner leh official dangten an tawiawm a ni.