Mizoram Youth Commission (MYC) chuan a hnuai ami angin Press Note an chhuah.

Tun hnai khan Poltical Party pakhat thuchhuah nia hriat, MYC hnuaia UPSC Civil Service (IAS) Online Coaching kalpui thin chu tihtawp satliah anga mipuiin an ngaih theih tur te, awmze nei lova MYC hnuaia thawktu mi eng emaw zat chu tawngpawng ban anga ngaih theih tur leh MYC Member hmasate an hun tawp hmaa sawrkarin titawp lui anga ngaih kawih theih tur chu tun hnaia tualchhung chanchin tharah hmuh leh hriat tur a lo chhuak a. Mipuite hnena hemi chungchanga thu dik leh thil awmzia hriattir hi ni 3.12.2019-a MYC Member meeting chuan tha a ti a; hetiang hi thu dik leh thil nihphung chu a ni :

Mizoram Youth Commission (MYC) hmalaknain UPSC Civil Service (IAS) Online Coaching chu Aizawlah VSAT khawl bunin batch hmasa ber chu March 2016 atang khan kalpui tanin, August 2016-ah batch 2-na, June 2017-ah batch 3-na leh August 2018-ah batch 4-na kalpui a lo ni tawh a. Hemi chungchang hi ni 25.7.2019-a member mi 12 telna MYC Consultation meeting chuan thlir leta uluk taka ngaihtuahin, MYC-in UPSC Civil Service (IAS) Online Coaching atan batch 4 lai a lo kalpui tawh chu UPSC Civil Service Preliminary Examination (IAS Prelim) tlinpui takngial pawh an awm thei lo nia hriat a nih avangin, kalphung thlak danglam a, MYC hnuaia UPSC Civil Service (IAS) Online Coaching chu tihtawp ni se, IAS, IPS leh IFS nih tum tak tak Mizo thalaite an tlin chhoh ngei theih nan theihtawp chhuaha hma thar lak ni se tiin a rel a; hemi atana hmalakna tur ruangam duang fel tur hian ruahman lawk sa angin MYC chuan member mi 30 vel sawmin ni 6.12.2019 hian Consultation meeting lian tham tak a nei dawn nghe nghe a ni tih MYC Chairman Dr Vanlaltanpuia chuan a sawi.

MYC Chairman Dr Vanlaltanpuia chuan, "MYC Chairman kal chhuak ta hun lai kum 2018 khan MYC hnuaiah kum khat chhung thawk turin hna hrang hrang atan thawktu mi eng emaw zat a la a; chumite hun kum khat chu a lo tawp chuan sawrkar leh kan hotute pawh rawn loin an thawh hun kan tihseisak zawk hial a. Mahsela, dan tlawhchhan tur leh thu tling behchhan theih a awm rih loh avangin, dan ang leh sawrkar min phalsak theih anga tha thara kan ngaihtuah tlan a ngaih thu kan thawktute chu thil awmzia tha taka inhrilhin kan inchawlhtir lo thei lo a. MYC chuan kan hmalakna Mizoram thalai a tam thei ang berin an chhawr tangkai theih turin ruahmanna hrang hrang kan duang fel chho mek a; chutiang chuan a tul ang zelin MYC mamawh dan milin thawktu tur lak phalna sawrkarah dil a ni dawn a ni," a ti a.

Tin, MYC Member ruat chungchangah, sawrkar Ministry hmasa hun lai khan ni 14.2.2014-ah kum 3 chhung atan MYC Member ruat an ni a; mahse, kum khat tha a vei awrh chauh tihin hemi thuchhuah thiatna leh chumite thlaktu tur MYC Member thar ruatna chu ni 7.5.2015 khan an tichhuak zui leh a. Hetiang tho hian kan hun ve hma ni 29.6.2018-a MYC Member ruatna thuchhuah thiatna leh MYC Member thar ruatna chu sawrkarin ni 15.10.2019 khan a rawn tichhuak ve leh ta a; hetiang hi a tul anga sawrkarin a ruahman fel a nih avangin politics inchirtheh nana hman chi nia a ngaih loh thu MYC Chairman Dr Vanlaltanpuia chuan a sawi bawk.