Kuthnathawktute Ni lawmna programme chawhnu lamah Mizoram sawrkar flagship programme thar New Economic Development Policy (NEDP) zirhona hun chu Lal Thanhawla Auditorium-ah neih a ni a. Mizoram Chief Minister Pu Lal Thanhawla chu khuallian niin Agriculture Minister Pu R.Lalzirliana leh Finance Minister Pu Lalsawtate chu khual zahawm an ni.
Chief Minister Pu Lal Thanhawla chuan New Economic Development Policy hlawhtlinna turin Mizoram sawrkar hnathawk rualten a nihna ang taka an buaipui thiam theih nan an hriat chian hmasak a tul a ni, a ti. Pu Lal Thanhawla chuan sawrkar laipuiin Planning Commission a thiat a, plan leh non plan sum te kai kawpin thil thar tam tak a thleng a, State sawrkar pawhin sum leh paiah thuneihna sang zawk a nei dawn nia a lan mek lai hian heng sum leh paite hi kuthnathawktute tan tangkai zawka hman dan tur kan ngaihtuah a ni, a ti a. NEDP kaltlang hian mamawh intawm, chhungkaw pakhat ai tamin an chhawr tangkai theih tur kawng leh khawl thil lian thamte ngaihtuahsak an ni dawn a, fur chhiat lai pawha zawh theih tur agriculture link road thar tam tak sial tuma ruahman mek a ni, a ti.
Chief Minister chuan NEDP hi tang te tanpuina tur a ni a, Mizoram mipui ten kawng engkima hmasawnna an neih theihna tura duan a ni, a ti a. Mizoram sik leh sa leh leilung enin NEDP hi tha taka kalpui a nih a, sawrkar hnathawk leh mipuiten tangruala hlawhtlin tuma theihtawp an chhuah phawt chuan India rama State entawntlak zingah Mizoram a tel theih thuai a beisei thu a sawi a ni.
Agriculture Minister Pu R.Lalzirliana chuan Mizoram chu India ram State hrang hrang zinga policy mumal neia kalpui thei tlemte zing a mi a ni, a ti a. Sawrkar policy hlawhtlinna chu sawrkar hnathawkte leh mipuiah a innghat tiin NEDP hlawhtlinna turin mipui leh sawrkar hnathawkten inlungrual taka an thawhho a pawimawh a ni, a ti. Agriculture Minister chuan NEDP hnuaiah scheme tam tak a leng a, sector tinah hmasawnna atana pawimawh zawng zawng deuh thaw he policy hnuaiah hian a thawh theih dawn a ni a ti a. Agriculture leh a kaihhnawih department hnuaiah agriculture link road siamna tur sum vaibelchhe 26 atan tender peih a ni tawh a, 450km a thui kawng sial tum a nih thu a sawi.
Finance Minister Pu Lalsawta pawhin ramin hma a sawn dawn chuan tharchhuah tam a ngai a, NEDP avang hian mipui nawlpui chhawr tangkai theih turin hnathawh tur (employment) a pun belh ang a, State thar chhuah Gross State Domestic Product (GSDP) a san phah a beisei thu a sawi a. Ei tawk tawk atangin ram danga thawnchhuah tham thar chhuah tum a nih thu te, kawng hrang hranga zuang lawr lovin hlawk tham law law a tih bik neih tum a nih thu te, boruak leh sik leh sa (environment) ti chhelo zawnga hmalak tum a nih dan te a tarlang a. Sawrkar chuan mipuite tana remchanna siamsak a, an mamawhte ngaihtuahsakin, a chhawr tangkai thiam thei tur lehkhathiam leh taima te an zuan luh a beisei a ni, Finance Minister chuan a ti.
NEDP zirhona programme hi State Planning Board Vice Chairman Pu H.Liansailova’n a kaihruai a. State Planning Board mi pawimawhte, sawrkar official te leh University mithiamte bakah kuthnathawktute leh political party aiawhte pawh he hunah hian an tel a. Pi T. Lalmuanpuii, Co-operative chairman pawhin thu sawiin, Mi pawimawh rual kalkhawmte hian NEDP chungchang zirhona hun an hmang a ni.
