Nimin chawhnu dar 2:00 PM khan Chief Minister Pu Lal Thanhawla chuan District Tuberculosis Centre(DTC) hmasa ber HPC sum Rs.54 lakh a sak chu mamawh tute tan Lunglei ah a hawng.

He DTC hawnna inkhawm ah hian Pu Lalrinliana Sailo, Health Minister chu khual zahawm atan hman a ni a, Pu Joseph Lalhimpuia Vice Chairman HPC Lunglei chu Special Guest niin Pu S. Laldingliana, Parliamentary Secretary, Health Department changtu chu Programme chairman ah a tang ani. DTC hawnna ah hian Pu S.Hiato, Minister of State leh Pu Zothangliana, Parliamentary Secretary bakah Pu R.L Pianmawia , Deputy Chief Whip te pawh an tel ve a ni.

Chief Minister chuan Mizote tan hriselna ngaihpawimawh tluka thil pawimawh a awm lo a ni, a ti a. TB te pawh a rem tawh emaw tih hnu a nei tam tak kan awm leh ta tih hmuh chhuah an a. He natna a lo tlem telh telh nan natna veitu leh mipuiten Doctor te an thurualpui a ngai a ni, a ti. Insak thalo lutuk leh contract hna chhe lutuk kara DTC building Lunglei chu entawn tlak taka sak a ni chu thil lawmawm leh entawn tlak ani a ti. Hnam ropui leh hmasawn ni tur chuan rilru leh taksa ah kan hrisel a ngai a ni, a ti a. Rilru hrisel lo avangin corruption-sum thianghlim lo duhna , zawm thawtna, mahni hna a tui lohna, compensation diklo dawn duhna leh thildang tha lo tam tak avanga harsatna mizoten kan vei mek a kan harh a hun tak zet a ni, a ti a. Sum leh pai leh ei leh bara intodelh tur leh rilru hrisel nei turin taksa hrisel kan neih pawimawh hmasak a ngai a ni a ti. Taksa hrisel nei turin zuk leh hmuam leh ruihtheih thil laka kan fihlim a ngaih thu a sawi a. Damlo inenkawlna a senso zawngzai te hi mi hausa tan pawh thil na mai a ni lova. In sum theih lohna avanga kan tuarna te hi mimal anga kan chinfel theih vek a nih thu a sawi. Chief Minister chuan ram hmasawn ruhrel dinna atan a hmun ruahman then khat chu compensation uchuak avang leh vantlang ten hrechianglova an do thin vang in lo hnawl a ni thin a, ram hmasawnna atana thil pawi tak a ni a ti a. Mizo mipuite chu hmathlir thui tak leh ram tana tha tur thil dawn thiam thin tur in a chah a ni.

DTC hawnna inkhawm ah hian Health Minister Pu Lalrinliana Sailo, Pu S.Hiato Minister, PHE changtu leh Pu Joseph Lalhimpuia Vice Chairman, HPC Lunglei bakah Director of Health Services ten thusawina hun an hmang bawk a ni.