Vawiin khan Ni 2 awh tur Rajiv Awas Yojana (RAY) training chu Pu Lalthuamliana, Jt. Secretary to the Govt. of Mizoram in Aijal Club ah a hawng.

Rajiv Awas Yojana (RAY) hi Ministry of Housing and Urban Poverty Alleviation (MoHUPA), Sawrkar laipui hnuaia hmalakna chikhat a ni a. RAY hi slum a chengte leh khawpui a miretheite hmasawnna/chawikanna tur a ni. RAY in a hmathlir ber chu India ram a khawpui a veng tawp lai leh mirethei te chenna hmun tih bo a ni (slum free India). He hmathlir hi a hlawhtlin theih nan hetiang hian hmalak tur a ni. 1) Slum awmsa te enkawla tih changtlun. 2) Slum thar awm zel lohna tur a hmalak.

India ram khawpui lian hrang hrangah hnathawh tan a ni. RAY hi hlawm hnih ah then a ni a. 1) Inpuahchah lawkna hun (preparatory stage). 2) Hnathawh tak takna hun (implementation stage).

RAY hnathawh hun hi bultan a nih atanga kum 2 chhung chu inpuahchahna hun a ni ang a, a bak chu 12th Five Year Plan 2013-2017 thleng Mission mode a kalpui tur a ni ang. Mizoramah hian Aizawl leh Lunglei ah RAY inpuahchah lawkna hun hman mek a ni a. He hna bik atan hian mithiambik hrang hrang bakah anmahni puibawmtu tur hnathawk mi 30 an awm mek a ni.

Zuangtui Area tana Detailed Project Report (DPR) siam chu North East State a Pilot Project Central Ministry in a pawm hmasak ber a ni nghe nghe.

He RAY hmalakna hi a hlawhtlin lehzual theihna atan hian Urban Development and Poverty Alleviation Department (UD&PA) Mizoram Sawrkar leh Regional Centre for Urban and Environmental Studies (RCUES), Lucknow leh Centre for Good Governance (CGG), Hyderabad ten vawiin khan training an neihpui tan a, naktukah chhunzawm a ni ang. Kolkata Municipal Council atang Er. S. Chandra, Chief Engineer pawhin zirtirna a pe bawk ang.

Training ah hian 1) UD & PA Directorate atang te, 2)Aizawl Municipal Council atang te, 3) Town & Country Planning atang te, 4) District UD & PA Office Champhai, Kolasib leh Lunglei atang te in an tel a ni.