Nimin khan Transport Minister Pu PC Zoramsangliana chuan Kolasib khaw chhunga mi harsa chenna tur In nei lo mi 89 te hnenah In sakna tur pawisa Rs 60,000/- theuh a pe a. Hei hi an In sak nana a ruangam an relna tur a niin 1st instalment a ni a. A zavaia mi pakhatin a dawn tur zat hi Rs 1,58,400/- a ni a, instalment li ah thena la pek chhunzawm tur a ni dawn a ni.

In sak tanpuina semna inkhawm, Kolasib Diakkawn Hall a neih hi District Urban Development Officer Pu Andrew Lalhruaia’n a kaihruai a. Thuchah sawiin Pu PC. Zoramsangliana chuan IHSDP hnuaia mi harsa in neilote tana hetiang ruahmanna a awm chu thil lawmawm tak a ni, a ti a. Tanpuina dawngtute chu an sum dawnte a tangkai thei ang bera hmang tur leh Department-in sak dan tur a tih ang ngeia tha taka sa turin a chah a ni.Kolasib chu Solid Waste Management a taka ti tura pilot project atana sawrkarin a pawmsak a nih thu leh hemi bul tan nan hian Kolasib khaw chhunga Veng fai ber lawman tum 10 lai lo la tawh College Veng chu thlan a nih tawh thu Minister hian a sawi a ni. Pu Ramsanga chuan Inthlanpui kan hnaih leh ta hle a. Hetihlai hian thudik leh dik lo kan thliar thiam fo a tul a. Thu chianglo mi lungkuai tur ringawt zawnga duh duh sawi kan bansan a tul a ni, a ti a. Mipuite pawh thudik thliar thiam thin turin a chah bawk a ni.

Kolasib-a Insak tanpuina hi mi 211 hnenah hun hma lamin pek alo ni tawh a. Tuna mite nen hian mi 300 a tling chho ta mek a ni. Tanpuina sem inkhawmah hian Pu R. Lalhmuliana, Jt. Director UD&PA chuan thu a sawi bawk a ni.