Cheng nuai 241 senga Local Administration Department siam Serchhip District Park, Dawngzawl ram ami chu Chief Minister Pu Lal Thanhawla’n November ni 22, 2014 (Inrinni) chawhma dar 11:00 khan a hawng.
Hawnna inkhawm Serchhip District Park Recreation Hall-a neih ah khuallian Chief Minister chuan LAD, UD&PA leh Social Welfare Department te thawhhona tha tak avanga Serchhip District Park puitling thei ta chu lawmawm a tih thu sawiin Department changtu Minister te leh thawktute remhriatna leh inpekna a fak a, mizoten fai kawngah zirtur kan la ngahzia sawiin kawng chi hrang hrangah fai ngainatna hi kan rilru ah kan tuh a ngai a, District Park pawh mipui ten neitu nihna thinlung kan pu lo anih chuan reilote ah a chul mai ang tih a hlauhawm a ni a ti bawk. Vaihlo, zuk leh hmuam hi nun titawitu, mitlinglova min siamtu leh kutdawha min siamtu a ni tiin insumtheihna nei turin mipuite a chah a Kristian tamna State kan nih ang ngeiin fai kawngah pawh hmahruaitu nih kan tum angai a ni a ti bawk.
Chief Minister hian kan ram hmasawnna bulpui ber atan chuan rinawmna, dikna, taimakna leh Pathian tihna nung neih a ngai a ni a ti a, uchuak taka Compensation ngiat vanga Mizoram hmasawnna hnathawh tura hmachhawp lian tak tak thuanawp ta engemawzat tarlangin tangka sum ngainatna leh duhamna sual kan hnawl ngam a ngai a, chhuan thar lo awm leh turte hmakhua ngai reng chunga kan ram leh hnam kan enkawl hi a tul takzet a ni a ti bawk. District Park thar chu tisa leh thlarau ah a tha zawnga hlawkpuina atana hmang turin mipuite duhsakna a hlan a, NLUP chungchang sawilangin Chief Minister chuan Sawrkarin NLUP hi a arkhawthim dai pui mai mai lova, ruahmanna felfai tak leh hmathlir thui tak nei chunga kalpui a ni a ti a, ramngaw siam leh ram bua siamthat te, tuihna thar siamthat leh tlangram lo neih bansan bakah Global Warming doletna tura kalpui tel anih avangin UNO pawhin a ngaihven a, an mithiamte vawi engemaw zat Mizoramah an rawn tirh hnu in thawhpui tlakah min ngai a, UN Agency lian pali te nen thla hmasa lawk khan thawhhona thuthlung an ziak nghe nghe tih a sawi bawk a ni.
Khualzahawm Pu P.C. Lalthanliana Minister LAD pawhin thusawiin District Park thar chu mizote, abik takin thalaiten hunawl hman dan kan thiam theih nan a pawimawh a ni a ti a, mihring nun hian hlim leh nun nuam a mamawh tih sawiin District park chu nawmchenna atan nilova chen nawmna atana hmang turin mipuite a chah a, a tha zawng leh tangkai thei ang bera hmang tura Serchhip leh a chhehvel klhua te ngenin Park nuam tak siam sak tu Sawrkar leh Department te chungah lawm nachang hria a,thianghlim takleh uluk taka enkawl turin a chah a ni.
Serchhip District park hi kum 2007-2008 financial year chhunga bultan a ni a, Dawngzawl ram, Serchhip atanga km 8 vela hla National Highway-54 kawngpui bulah awmin a zau zawng hi 22.19 bighas a ni a, Swimming Pool 2 (Puitling leh naupangte tui chenna tur), Shower room, Chawlhbuk engemaw zat leh Choka, Dining Hall, Recreation Hall, Chowkidar chenna quarters bakah Tui dahkhawlna tha tawk tak leh Artificial Lake zau tak siam ani bawk. District Park a hman tur tui hi kilometre 4 vel a hla Bawngchawm ram atanga lak a ni.
District Park hawnna Inkhawm hi Pu K Lalmuana ,Addl Secy LAD in kaihhruaiin, Pu ST Lalhmingmawia , DLAO, Serchhip in Project Report hi a pe a, Pu A. Biaklawma, Director, LAD in lawmthu sawiin hnu a khar a, tlaiah Park thar lawmna ruai theh a ni.
