November 22 Inrinni zan thimhlim ah khan Vaivakawn atanga Aizawl tlaklama awm veng 12 te panna kawngpui rawt hniam leh laih zauh hna chu UD&PAD Minister Pu Zodintluanga'n lei laihna hmanga kawng chek phut hmasa in tan a ni a. He kawng zauh hna hi UDPAD Department, PWD, P&ED,PHED leh BSNL te thawhhona niin a rang thei ang bera zawh tum a ni. He project ah hian lungrem, steps, pavement leh kawng laih in a tih chhiat siamthatna te a tel bawk a ni.

UD&PAD Minister Pu Zodintluanga chuan Aizawl khawpui lo thang zelah a chhunga kawngpui te a lian tawk lo tih kan hmu chhova, kawtchhuah lunlai leh kawng pengthuam pawimawh laite hi a remchan dana kan tih zauh zel a tul hle a ni a ti a. Tun hi hnathawh hun a ni a, a tlai tak tak hmain hetiang kawngzauh hna sawrkar in a thawk thei hi thil lawm awm tak ani a ti.Vaivakawn kawng pengthuam zauh hna thawh tan tak hi Aizawl tlak lam veng 12 a chengte tana inkalpawhna thawl zawk siam sakna chauh nilovin thangthar lo la awm chho zel turte tana Sawrkar in a ro hlu a siamsak a ni a ti. He kawnglaih hna thawh theih a nih nana helai kawngpui, nitina hmang thin veng 12 ten sawrkar an thlawpna ah lawm thu a sawi a. Kawng laihna sum Rs 107 Lakhs hi UD&PAD in special plan assistance(SPA) atangin Improvement of Vaivakawn Junction project siama a hmuh a nih thu sawiin Minister chuan he project a Department hrang hrangte lungrualna leh thawh tha hmuh chu a nawm thu a sawi bawk a ni.