Home Minister Pu R. Lalzirliana chuan vawiin khan Zofate insuihkhawmna kut hman mek Zofa Global Unity Festival 2014 kharna Rih Dil a neih chu a hmanpui. He hun hmang tur hian Parliamentary Secretary Pu KS Thanga leh MLA Pu Vanlalzawma bakah Addl. DGP Pu. Lalthianghlima leh IGP Pu. Zorammawia ten Home Minister hi an tawiawm a ni.

Minister Pu R. Lalzirliana chuan Zofate inthendarh tawh insuihkhawm leh theih nan mahni hmazawn theuhvah kan thawk tur a ni, a ti a. Zofate tumah thangtlawm a insiam tur kan niloh thu leh, Zofa hmun hrang hrang a awmte chu Mizoram tlawh a lo lut turin kan inhawng reng a ni, a ti a. Chutihrual chuan mahni unaute ngei tana chhiatna thlen thei ruihhlo tawlh a sumdawng tur a luh tum chu phalsak an nih loh tur thu Pu R. Lalzirliana chuan a sawi a ni.

Vawiin huna Khualzahawm Pu Robert Romawia Ralte, Chief Managing Director, NECS leh ZGN Advisor ni bawk chuan thusawiin, hnam dang laka kan zahawm nan Zofate kan in unau tlan zel a, kan inzah tawn thiam a tul a ni, a ti a. Zirna kawngah te, infiamna, zai leh lam ah te, sumdawnna leh sakhuanaah te insuihkhawmna kawng zawn thiam zel a ngai a ni, a ti.

Tarlan tawh angin Zofa Global Unity Festival hi Zofa Global Network buatsaih a ni a. Ni thum chhung awhin, a hmasa ni hnih hi Zokhawthar, Champhai a hman niin, vawiin a kharna hi Rih Dil, Myanmar a hman a ni thung.