Mizoram mipui leh zofa zawng zawng te,

Lal Isua Krista, min chhandam tura a lo pian champhaah hian chibai ka buk a. Dam tak leh hlim taka he hun hi in hman theih nan duhsakna ka hlan a che u. Hunpui tluang taka kan hman theih nana sawrkarin khapna a siam hrang hrangte pawh khua leh tuiten tha taka lo zawm turin ka ngen che u a ni. Damlohna avanga damdawiin leh inenkawlna hmun danga awm mekte pawh kan hrereng che u a, in tan kan tawngtai a ni.

Pathianin khawvel tana thilthlawnpek a pekna ni a nih angin, midangte tana inpekna leh tanpui ngaite tanpui duhna thinlung pu chunga Christmas hmang turin ka sawm che u a, a pe thin te hnenah pawh lawmthu ka sawi a ni. Kan inpeizawn liam liam hian chhungkua leh khawtlang nuam kan siam thin a, inngaihsak tawnna hian inrintawnna min pe a, inrintawnna chuan kawng hrang hrangin rah tha a chhuah thin a ni.

Pathian leh khawvel inrem lehna ni a nih angin, mitinin inunauna leh inremna chawisang thar leh ila, hnam hrang hrang chenna ram lian taka awm kan nih avangin mipuite inpumkhatna hian chakna thahrui min pe a ni.

Pathian leh ram mipuite zarah sawrkar thar kan nei a; he sawrkar a lo pian theih nana kan auhla langsar ber pakhat chu “Ram rorelnaah Pathian ram lo thleng rawh se” tih hi a ni. Pathian ram a lo thlen theih nan hian ‘Tawngtai Pawl” te pawh kan din a, hmalak dan turte pawh uluk takin kan buatsaih a ni. Kalphung thar “Mipui sawrkar leh mitin huapzo” din a, Pathian duh dan ang ngeia sawrkarna kalpui kan tum a, kan beisei dinhmun kan thlen theih nan, mahni zawn theuhva sawrkar lo thawhpui zel turin ka sawm che u a ni.

Pathian ram lo thlenna daltu lian tak pakhat kan hmachhawn mek chu ‘ruihhlo’ hi a ni a, tunah ngei pawh hian kan thalai za tam takte ruihhlo bawihah tang mekin, nu leh pa tam takte lungngaiin an kaikun mek a ni. Chuvang chuan kan sawrkar hian ruihhlo dona leh ruihhlo bawiha tang mek te chhanchhuahna hi a ngai pawimawh em em a, mimal tak pawhin ka vei em em a ni. Lak luh ka nih ni la la khan; kan chenna in pawh pan hmasa lovin Tawngtai Bethel Camping Centre, Sakawrtuichhun ka pan nghal a. Ruihhlo bawiha tang mek kan thalaite ka tlawh nghal nghe nghe a ni. Anni ho te chhanchhuak tur leh ruihhlo bawiha tang zel turte venghim turin sawrkar chuan hma a la dawn a, mitinte thawhpuina pawh ka ngen tak meuh a ni. Kan hunpui, Christmas leh kum thar te pawh hi zu, ruihhlo leh nulat tlangval nawmchenna lama tluk nan thalaiten kan hmang ral mai mai ang tih ka hlau hle a, chutiang nunkawng tha lo lakah chuan invawng him tlat ang u.

Pathianin min veng anga, kan hma lawkah kum thar kan chuangkai dawn a. He kum thar hi intan kum tha, malsawmna tam tak in dawn kum a nih theih nan duhsakna ka hlan a che u.

Kumthar a nih angin thinlung thar nen hmalam thlir ila, nun hlui tha lo, paih ngai kan neih apiangte paihin, thil tha lo kan chunga lo thleng tawhte pawh inbawhbeh tir hek lovin; beiseina thar nen hma lam I pan zel ang u.

Ka lawm e.