3236/2024-2025

Dated Serchhip, the 27^th November, 2024: Public Health Engineering, Rural Development leh Horticulture Department changtu Minister Prof.Lalnilawma chuan “Chief Minister Pu Lalduhoma kaihhruai Mizoram Sawrkar chuan kuthnathawktute tan theih tawp a chhuah mek a, a chhuah chhunzawm zel dawn a ni” a ti. He thu hi vawiina East Lungdara Shyama Prasad Mukherji Rurban Mission (SPMRM) aṭanga sak Solar Cold Storage Facility a hawnnaa a sawi a ni a. Leng khuaa Solar Cold Storage Facility pawh vawiin vek hian a hawng nghal a ni.

Minister Prof.Lalnilawma chuan kuthnathawktute thlaithar vawn ṭhatna tur cold storage hawn a ni ta chu lawmawm a tih thu a sawi a. Lo neituten tangkai taka an hman a duhsak thu leh, ei leh bar intodelhna kawnga hmanraw tangkai a nih ngei a beisei thu a sawi a ni.

East Lungdar,  Leng khua leh a chheh vela Rural Development Dept. leh Horticulture Dept. hmun hma leh hmalakna te Minister chuan a tlawh nghal a. PHE hmunhma te tlawhin East Lungdar leh North Vanlaiphai khaw tana Tui pump tura hnathawh mekna Tuipuiah leh Varva lui (Rawleihlawn chhuah) a tlawh bawk a. A thawktu Contractor te pawh koin, an hna ṭha taka tawk turin a hrilh a. Vantlang mipuite tan tui mamawhna a san tawh em avangin hna chak taka thawk turin a hrilh a ni.

Minister Prof.Lalnilawma hian East Lungdar leh Leng khuaah mipuiin an duh leh an mamawhte an thlen theihna hun siam sakin Public Interview hun a hawng a, mipui ten an hlut hle.

Minister Prof.Lalnilawma hi Project Director, DRDO Serchhip Pu.Malsawmtluanga Fanchun, SDO (Civil) North Vanlaiphai leh BDO East Lungdar  Pu. Peter Malsawmtluanga, Serchhip District Horticulture Officer Pu.R.Lalrintluanga, leh PHE Dept SDO East Lungdar Pu.Mangliandinga ten an ṭawiawm a ni.