3536/2024-2025

Dated Serchhip, the 14^th December, 2024: International Paragliding Accuracy Championship leh Air Sports Festival 2024 kharna inkhawm chu vawiin chawhnu khan Serchhip Zawlpuia programme buatsaihah khar a ni a.  Chief Minister Pu Lalduhoma chu khuallian niin Tourism Minister Pi Lalrinpuii chu khual zahawm a ni.

Chief Minister Pu Lalduhoma chuan thu sawiin, infiammite tumruhna leh inpekna a fak a. Ram dangte nena inpawhna leh inṭhianṭhatna siamna kawnga he hun pawimawhzia sawiin, Mizoram chu adventure tourism hmunpui a nih theih dan a tarlang bawk. Serchhip khawpui boruak muanawm, mawi leh hmuhnawm takah paragliding atana hmun tha tak a awm chu lawmawm a tih thu Pu Lalduhoma, bialtu MLA ni bawk chuan a sawi a. Helai hmun hi India rama adventure sports atana hmun tha ber pawl a nih avangin Adventure Tourism hmasawnna atana hmun pawimawh tak a ni, a ti. Tualchhung Mizo pilot-te thawhrimna chu lawmawm a tih thu leh a chhuan thu Chief Minister chuan a sawi a. Heng pilote te inpekna leh thiamna te bakah Mizoram Sawrkar, MASA, FAI leh Serchhip mipuite thawhhona tha tak avangin he Championship hi a hlawhtling a ni, a ti bawk.

Tourism Minister Pi Lalrinpuii chuan International Paragliding Accuracy  Championship hlawhtlinna tura thawktu zawng zawng - Serchhip DC hoa din Organising Committee te, Tourism Department te,  MASA te, Serchhip mipuite leh tha leh zung thawhtu zawng zawng chungah lawmthu a sawi a. Adventure Tourism a tui tak leh hmang hria Chief Minister kan nei chu kan vannei tak zet tih sawiin a zarah vawiinah a bial chhung ngeiah khawvel huap inelna Mizoramin kan thleng thei a ni, a ti. Pi Lalrinpuii chuan ram dang atanga lo kalte chungah lawmthu sawiin championship chu anmahni vanga hlawhtling a ni a, an rama an haw leh hunah pawh Mizoram hrereng turin a chah a ni.

He championship-ah hian ram paruk—India, Korea, Kazakhstan, Spain, Indonesia, leh Nepal aṭangin infiammi mi 30 an tel a. Closing ceremony ah hian pilot tithate hnenah lawmman hlan a ni a. Lawmman dawngtute chu:-

Men’s category-

1na Aman Thapa (Nepal)

2na Yuda Mesa Putra (Indonesia)

3na Akshay Kumar (India)

Women’s Category-

1na Eun Young Cho (Korea)

2na Disha Fajar Praharini (Indonesia)

3na Alisha Alisha (India)

Team Category ah Indo David Team, Indonesia leh Spain inkawp chu champion an ni. 

National Category Men’s:

1na Akhsay Kumar

2na Ram Vilas Verma

3na Shinde Ram

National Category Women’s:

1na Alisha Alisha

2na Sophia Biakdingpuii

Category tinah hian pakhatnain cheng nuai hnih (₹2,00,000), pahnihna cheng nuai khat sing nga (₹1,50,000) leh pathumnain cheng nuai khat (₹1,00,000) an dawng a ni.

Kharna inkhawmah hian hian  Dr. Lalrozama, IAS, Secretary, Tourism; Pu Paul L. Khuma, Deputy Commissioner, Serchhip, Pu Fari Botol, Meet Director, FAI; Pu J. Vanlalliana, President, MASA; Fédération Aéronautique Internationale (FAI); Aero Club of India, leh Mizoram Aero Sports Association aiawh te an tel a ni.