777/2026-2027 

Dated Aizawl, the 30th May, 2026: Inrinni zan khan Mizoram Mixed Martial Arts Association (MISMA) buaitsaih MISMA Fight Night chu R. Dengṭhuama Indoor Stadium, Mualpui-ah neih a ni a. He hun hi Chief Minister Pu Lalduhoma chuan khuallian niin a hmanpui. Special Guest UFC Flyweight Champion Joshua Van chuan a telpui bawk a ni.

Chief Minister Pu Lalduhoma chuan thu sawiin, Southeast Asia atanga UFC Champion hmasa ber Joshua 'The Fearless' Van chawimawi a ni chu Zoram mipuite tan chhinchhiah tlak tak a nih thu a sawi a. Chief Minister chuan Mizote, Chin leh Kuki-te hi hnam pakhat leh chhungkua pakhat niin, inzawmna leh unauna tha neih a pawimawhzia a sawi bawk. Joshua Van chu a mite aiawhin khawvel hmaah a ding a, chu chuan hnam inpumkhatna leh inpawhna a tichak zual a ni, a ti.

Pu Lalduhoma chuan Joshua Van chu chhuanawm a tih zia sawiin, a professional record ropui tak - vawi 17 hnehna chang tawhin, vawi 9 knockout (17 wins with 9 knockouts) hmanga hnehna a lo neih tawh chu a sawi a, he record hian score mai piah lamah ṭhalaite tan chona a siam a ni, a ti. World Pro Taekwondo Headquarters Federation atanga 7th Dan Black Belt lo dawng tawh a nih angin Chief Minister chuan dinhmun sang tak thlen nan chuan mahni inthunun theihna te, teirei peihna leh rilru chhel tak (strong mental fortitude) neih a ṭulzia a sawi a; he hunah hian International MMA Federation aiawhin Shariq Bapu (Senior VP, Asian MMA Federation) hnen atangin Honorary Black Belt chawimawina sâng tak a dawng chu lawmawm a tih thu a sawi bawk.

Chief Minister chuan Joshua Van-a hlawhtlinna hian Mizo thalaite chu tum sang zawk neih theihna leh, huai taka khawvel hmachhawn ngam zel turin a fuih a ni, a ti. Joshua Van hnenah lawmthu sawiin, Mizoram chuan a hmachhawp zawng zawngah a tawiawm zel dawn a ni tih a sawi bawk. 

Sports Minister Pu Lalnghinglova Hmar chuan kalkhawmte hnenah MISMA Fight khuhhawnnan thusawiin, Mizorama Boxing leh contact sports hrang hrang 'Centre of Excellence' sakna tur cheng vaibelchhe 38 chu Ministry of DoNER hnuaia 'North East Special Infrastructure Development Scheme - Other Than Roads Infrastructure (NESIDS-OTRI)' atangin approval an hmuh tawh thu chu sawiin, lawmawm a tih thu a sawi a ni.

MISMA Fight Night inelna (bouts) kal dan tlangpui chu hetiang hi a ni:

Featherweight (65.8 kgs Amateur Bout): Lalramsangliana (SPES Gym, MISMA) leh Jeff Diengdoh (HR MMA Gym, Meghalaya) te intumin, Lalramsangliana chuan hnehna a chang a. Trophy hi Pu Prasad Gaitonde, GS, MMA India in hlanna hun a hmang a ni.

Super Lightweight (-74.8 kgs Semi-Pro Bout): David Lalmalsawma (SPES Gym, MISMA) leh Zacharia (Elite Gym, MISMA) te intumin, David Lalmalsawma chu a chak a, trophy hi Pu Sharif Bapu, Sr. VP, Asian MMA Fed. chuan a hlan a ni.

Co- Main Event Featherweight (-65.8 kgs Semi-Pro bout): Lalnunmawia (SPES Gym, MISMA) leh Lalruatmawia (Zonet Mega Boxing Champion) te intumin, Lalnunmawia chuan hnehna a chang a, Belt hi Joshua Van leh Pu LV Lalthantluanga, Zonet Director ten an hlan a ni.

Main Event Bantamweight (-61.2 kgs Professional Bout): Lalnunsanga (SPES Gym, MISMA) leh Thangsanglian (Genesis Gym, Manipur) te intumin, Lalnunsanga chuan technical knockout in hnehna a chang a. He bantamweight belt hi Chief Minister Pu Lalduhoma leh Sports Minister Pu Lalnghinglova Hmar ten an hlan a ni. 

He hunah hian Joshua Van pawhin thu a sawi a, tualchhung khawtlang community hrang hrang: CRCM, Chin Community, Zofa Global, Zoro, Muay Thai Association of Mizoram leh Assam MMA te chuan UFC Champion Joshua Van hnenah chawimawina an hlan bawk.

He Fight Night-ah hian IPRP&S Minister Pu B. Lalchhanzova, RD&AD Minister Prof. Lalnilawma, Deputy Speaker Pu Lalfamkima, Pu Lalmuanpuia Punte, MLA (Adviser to CM), Lt. Col. Clement Lalhmingthanga, MLA (Hony. President, MISMA) leh Pi Baryl Vanneihsangi, MLA  te’n Chief Minister Pu Lalduhoma an ṭawiawm a. Central YMA hruaitute, Sports lama hruaitute, sawrkar officials te leh International MMA Federation aṭangin ṭhahnem tak an tel bawk.