Vawiin khan Chief Minister leh PWD Minister ni bawk Pu Zoramthanga'n Mizoram Sawrkar hnuaia Department hrang hranga thawk engineer te intelkhawmna pawl Mizoram Engineering Service Association(MESA) inkhawmpui General Conference vawi 39-na, CIRA Garden Lawibual ITI ah a hmanpui.

Conference hawnna session ah thu sawiin Chief Minister Pu Zoramthanga chuan Mizoram chu kawng engkimah, ram ani emaw, sik leh sa nuam a ni emaw, thei leh thlai chitin chin theihna kawngah ani emaw, ruah tui ani emaw Pathian malsawmna nasa takin kan dawng a, heng kan hausakna ‘asset’ te hi thil tihtheihna leh hnathawh theihna ‘potential’ tha tak a ni a. Hengte hmangin Zoram hi hnute tui leh khawizu luanna ramah kan siam theiin kawng hrang hrangah kan intodelh thei a. Mahse chumi tihlawhtling tur chuan kan rilru sukthlek leh ngaihtuahna ‘mindset’ kan thlak a ngai ani, a ti.

Pu Zoramthanga chuan Sawrkarin Mizo contractor leh supplier te hna lian thawk thei tura hlankai ‘upgrade’ a duh a, hna lian an khawih theih nan ngaituahna sen a tul a. Heng te hi Works Department pawhin an rilruah lo nei se tiin a duh thu a sawi a. Sawrkarin hnamdang contractor leh supplier te a tlem thei ang berah chhawr leh hman a duh tih a sawi bawk a. Enkawlzuina ‘maintainance’ a bik takin khawl leh hmanrua te chu a vei leh a thupui anih thu sawiin Chief Minister chuan engineer rual kalkhawm te chu an khawl te enkawl kawngah tan la thar a, hman tlak lova a awm loh nan, a siamthat leh a enkawl te chu ngai pawimawh turin a chah a ni.

Conference a thusawitu ten MES, Secretary hna chelh ten Technical Department lian zual, hun rei tak an enkawl tawh loh an sawi lan chu chhangin, Chief Minister chuan Secretary te hna chanpual siksawi hunah Technical Department lian pakhat tal chu sawrkarin a chan tir dawn tih a sawi. Department hrang hranga post hnawhkhah loh tam tak chu vawi leh khata hnawkkhah theih vek a ni lova  mahse kan mamawh phuhru tur, a chanve tal chu sawrkarin a ngaihtuah dawn a, hlawkpui zawka kalpui theih dan ‘outsourcing’ te pawh hi thenkhatah chuan ngaihtuah a tul tih a sawi bawk a ni.

MESA Conference ah Chief Minister Pu Zoramthanga hian MESA in Journal an siam Zoram Ruhrel - The MESA Journal 2019  a tlangzarh nghal a ni.

Inaugural Session an pawl President, Pu Bowmana kaihhruaiah, General Secretary Pu Lalrinmawia hnen atangin Annual Report ngaihthlak a ni a. Member 2 boral te sunna hun te, Pensioner 11 te thlah nan citation hlanna te, member 40, Grade hrang hranga kaisang te lawmpuina  leh member thar 2 te lawmluhna hun te hman a ni.

Chawhnu session lamah kum 2019-2021 chhunga MESA hruaitu thlanna neih niin rorel inkhawm neiin Agenda hrang hrang sawiho a ni.

Kum 2019 - 2021 chhunga MESA hruaitu tur thlan chhuah te :

Prerident : Er. Lalropuia
Vice President : Er. H. Zoramliana
General Secretary : Er. Lalrinmawia
Treasurer : Er. Beizawzi T. Azyu
Fin. Secy : Er. Zirthanmawia Hmar
Secy i/c Inf & Pub : Er. Lalrinzuala Ralte
Jt. Secy i/c PWD : Er. C. Lalthangvela
i/c P&ED : Er. H. Lallianmawia
i/c PHED : Er. K. Zohmingliana
i/c I&WRD & Others : Er. L. Malsawma Hauhnar

MESA hi May Ni 14 1972 ah din niin Member 400 chuang an awm mek a ni.