Fostering Climate Resilient Upland Farming System (FOCUS), District Management Unit, Kolasib hmalakna in vawiin khan Kolasib St.Joseph’s Parish Hall ah District Level Village Council Consultation Meeting neih a ni.

FOCUS Project hi International Fund for Agricultural Development (IFAD) bultuma hmalak chhoh tur niin a thil tum ber chu thingtlang lo neia eizawng ten thlai an thar tam zawk theih nana hmalak leh kum tin lo hal avanga sik leh sa inthlak danglam nasa lutuk tih ziaawm a ni a,  kum 6 chhung (2018-2024) a tana ruahman niin tanpuina sum hi IFAD atangin loan in USD 35.25 Million ruahman ani a, Sawrkar Laipui in State Sawrkar ah a pe a, Mizoram Sawrkar in counterpart funding USD 11.14 Million leh Complementary Convergence funding USD 13.13 million a pe anga, beneficiary contribution a tan USD 2.36 Million a pe bawk ang.

He hun hi Kolasib DAO Pu J. Rothanga’n a kaihruai a, khuallian Kolasib Bawrhsap Pu Zoengsanga chuan thusawina hun a hmang bawk. Khuallian chuan Ram leh Hnam dinhmun ngaituahin lungawi a har a, kan ram kan ti chereu nasa a, tui hna in a tuar a, ramsa in an tuar bawka chu chuan sik leh sa bakah nitin a mihring nunphung a ti khaihlak nasa em em mai a, nungcha leh kan ramngaw te hi kan humhalh a hun takzet tawh ani a ti. State hrang hrangin economy a tana innghahna tur an nei a, Mizoram hian hemi kawnga hma kan lak theihna kawng pakhat chu Hnam intodelh nih kan tum tur ani tiin kan thlai leh ran tharchhuah te hi ram ngaw ti chereu lo zawng leh boruak tichhe lo zawnga kan kalpui a ngai ani tiin rinawm taka hna kan thawh chuan Pathian pawhin mal a sawm ngei ang tih a ring tlat ani tiin awmze nei zawka thlai leh ran enkawl chungchanga Project tha tak FOCUS chu Mizoram tana hmasawnna rahbi pawimawh tak ni turin duhsakna a hlan bawk a ni.

FOCUS Project hian Mizoram District 8 zinga 4 heng Champhai, Kolasib, Serchhip leh Mamit District chhunga khaw 272 a kalpui tur ani a, Project thil tum pawimawh tak chu zawi zawi tlangram lo vah leh lo hal kalsan a, sik leh sa mil a thlai kumhlun hmanga lo neitute sum dehchhuah tihpun sak a ni. Hemi bakah hian ramngaw ti chereu lo zawng leh tunlai thiamna sang zawk hmanga thlai chi tha zawk leh ran enkawl dan tha zawk inkawhhmuh te pawh a tel a ni.

He Project hi hlawm thum (3) ah then ani a: thingtlang lo neih tih hmasawn, man man zawka ran leh thlai thar chhuahte deh ral theihna tura ruahmanna hrang hrang siam leh Project kaihhruai dan leh thiamthil inzirtirna a ni.

Project hnuaia hnathawh dan kalhmang tur chu, intuaihriamna leh inzirtirna inpek chungchangah hian Food and Agriculture Organisation, District Management Unit leh Village level worker te hmanga inzirtir tur ani.  Nursery siam dan zirtir bakah leilung hang tha luangral tur ven kawnga hmalak te bakah ran vulhtute pawhin hlawk zawk leh ram tichhe lo zawnga ran an vulh theih nana zirtirna pek te, ranvulh hrileng danna pek te leh an tharchhuah te hlawk zawka an hralh theihna tur te ngaituahpui a ni.

Kolasib District a FOCUS Project kalpui tur hian thawktu 43 chu DAO Office hnenah pek an ni a, District Programme Manager, Assistant Manager Planning leh Finance, Agriculture, Horticulture, Soil leh vety atangin Technical Officer pakhat theuh, Circle Staff leh Village Level Worker te an awm dawn a ni. He hunah hian Kolasib District VC 53 atangin VC 49 hruaitute an kalkhawm a ni.