Vawiin hian Dr. K. Beichhua, Hon’ble Minister of State, A.H. & Vety, Social Welfare Department etc chuan Thenzawl Vety Farm leh Eklavya Model Residential School, Serchhip a tlawh a. Pu H. Lalzirliana, MLA Mamit bialtu chuan a tawiawm.

Thenzawl Vety Farm ah Minister chuan thusawiin nitina hmasawn tur kan ni a, Thenzawla Vety Department ram aia tha hi hmun dangah ram kan nei chuang lova hemi tihhmasawn tuma theihtawp kan chhuah tlan a tul a ni, a ti. Sawrkar hmasa in NEDP sum hmanga hma a lo lak tawhna te pawh thil tha anih chuan hma kan lak chhunzawm zel dawn a ni, a ti.

Minister hi Dr. Hmarkunga, Director AH& Vety leh Dr. Saihlira, Addl. Director te leh Vety Officer dang ten an lo dawngsawng a.  Dr. Lalramhluna, General Manager, chuan Thenzawl Vety Farm chanchin tlangpui sawiin, ni 25 October, 1981 ah din tan a ni a, tunah ram 728 acres a zau an enkawl mek thu a sawi. Thawktu mi 41 an awm mek a. Fodder Development Farm, Duck & Poultry and Dairy Farm, Amusement Park and Livestock Based Ecotourism, Goat breeding farm te chu an hmalak mekna a nih thu a sawi a. Sial vulhna tur NEDP atanga sum an hmuh hmanga an sak mek thu a sawi bawk. Kumin April ni 11 atang khan Kel lian chi Rajasthan atanga an chah luh chu an vulh tan a, tun ah hian Kel puitling 83 leh a note 4 an neih mek thu a tarlang bawk.

Chawhnu lamah Serchhip Kawlri tlanga Eklavya Model Residential School chu a hmunah kalin a tlawh nghal bawk a. Minister chuan Tribal kan nihna hi kan vanneihpui thei ani tih hre turin zirlaite a chah a, Tribal Affairs Ministry in duhsak taka a thlawna zirna changtlung tak mi siam sak hi a lawmawm hle a ni a ti. Zirlai te chu taima taka lehkha zir a, mi puitling leh chhawr tlak ni ngei tura tan la turin a chah a. Mi taima tan chuan eng kawngah pawh hlawhtlinna a awm thei zel ani, tiin a fuih a ni.

Pi A. Vanlalzami, Joint Director, Social Welfare Department chuan kum thar atangin CBSE syllabus an zir tawh dawn thu sawiin, Ministry pawhin result tha tak nei ngei tura min beisei thu a sawi a. School mamawha hman turin lirthei pek thuai an nih tur thu leh zirtirtute hlawh pawh ennawn anih tur thu a sawi bawk.