Vawiin khan Pu C. Lalengzauva, District Agriculture Officer chuan a Office Chamber-ah tunhnaia Mamit District-in kan hmelhriat Fall Army Worm (FAW) chungchangah thutharthehdarhtute a kawm.

Pu Zauva chuan Vaimim leh thlai dangte ei chhe thei Fall Army Worm(FAW) chu Mamit District chuan thla hmasa April atang khan hmelhriat tan a nih thu a sawi a, khaw hrang hrang 37-a chhungkaw 551 atangin he natna hrik chungchang hi complain dawn a nih thu a sawi. FAW tirem tur hian District Agriculture Office chuan hma chak takin a la chho mek zel a, tun dinhmunah a hlawhtlinna pawh hmuh chhoh mek zel a nih thu a tarlang a. FAW tihrem nana damdawi hman chungchangah Social Media-ah thubelhchiandawllo thehdarh awm a awm thu sawiin he hrik thah nana hman damdawi chu a pawng taka mihring tana hlauhawm a nih loh thu sawiin Ni 10-15 chhung vel chu hman atanga ei loh a him thu a sawi a, Vaimim mai bakah a bul vela thlai te pawh ni 15 a ral hma loh chuan ei lo turin mipuite a ngen a ni. Mahni thlai thar ei/zuarte pawhin hei hi ngaihpawimawh a tul thu a sawi.

DAO chuan State Level Response Team-te chuan District Level Fall Army Worm Reponse Team din tura tih an nih angin din tura hmalak nghal a nih thu a sawi a, State Level-ah chawlhkar hnih dan zelah report pek thin a nih dawn thu a a tarlang bawk.

Vawiin inkawmhonaah hian MJA hi an President Pu C. Lalramdinzela, chuan hovin Pu Lalbiakthanga Pachuau SDAO, Mamit bakah DIPRO Office aiawhte an tel a ni.