No.3204/2021-2022

Aizawl the 30th November, 2021 : Mizoram mamawh thlena New Delhi a cham mek Mizoram Chief Minister Pu Zoramthanga chuan vawiin chawhma khan India Prime Minister Pu Narendra Modi chu Parliament Building-a a office-ah hmuin inkawmna hun tha tak an hmang a. Mizoram mamawh hrang hrang a thlen te chu Prime Minister Pu Narendra Modi hian ngai pawimawhin a tul anga bawhzui a nih tur thu a sawi a ni.

Chief Minister Pu Zoramthanga chuan kum engemawzat liam ta atanga Prime Minister leh Union Home Minister hrang hrang ten an lo tiam tawh angin Mizoram State-in All India Services cadre hrang a neih ve theihna tura chak taka hma lakpui turin Prime Minister Pu Narendra Modi a ngen a. Separate Cadre Mizoramin a neih ve theihna tura a khawihtu ber Union Secretary hnenah lehkha ziaka, tihhlawhtlin thuai a nih ngei theih nan file pawh chak taka kal tir nghal tura hriattir turin Prime Minister a ngen a. Mizoram Sawrkarin Mizo tawng thiam ngei Chief Secretary a neih theih nana Sawrkar Laipuia ngenna a lo thlen tawh chungchang pawh sawipuiin Prime Minister hian a lo bawhzui tur thu a sawi a ni.

Chief Minister chuan Mizoram Sawrkar hmalakna pawimawh tak mau chungchang pawh Prime Minister hi hrilhin mau chinna hmun te leh a sawngbawlna hmun (industry) te chu a thlalak nen chipchiar takin a sawipui a. Bamboo link road kawng sial a tulzia a thlen chu Pu Narendra Modi hian ngaih pawimawhin a hlawhtlin ngei theih nan Finance Minister hnenah sum leh pai sanction-na turin Head of account siam tura a hriattir tur thu Pu Zoramthanga hi a lo hrilh a ni.

Myanmar ram buai avanga Mizorama tlanchhia refugee te tanpui turin Chief Minister chuan Prime Minister hi a ngen a, MNF returnees te tan Housing Assistance a dilpui bawk a. Prime Minister chuan a tul anga a lo enzui tur thu a hrilh a ni.

Hmarchhak State te bakah Mizoram ramria Bangladesh leh Myanmar-a politics boruak pawh Prime Minister Pu Narendra Modi nen hian an sawi dun a. Chief Minister Pu Zoramthanga chuan Prime Minister nena inkawmna tha tak an hmang thei chu lawmawm a tih thu sawiin, meeting an neih dun tawh zingah a hlawhtling ber pawl nia a hriat thu a sawi a ni.