No.3214/2021-2022

Aizawl the 30th November, 2021 : Vawiin chawhnu dar 3 khan Mizoram Chief Minister Pu Zoramthanga chuan Union Finance Minister Pi Nirmala Sitharaman chu Parliament Building-a a pisaah a hmu a, Mizoram mamawh hrang hrang a sawipui.

Pu Zoramthanga chuan Mizoram hmasawnna tura sawrkar hmalakna pawimawh ber te zinga mi mau tihpun leh sawngbawl chungchang Finance Minister hi a sawipui a. Lian tham taka hmalak tum a nih dan hrilhfiahin heta tana pawimawh em em kawng thar link road sial a tul zia Chief Minister chuan a sawi a, Sawrkar Laipui atangin heta tan hian sum mamawhte pe turin a dil a.  DPR mumal taka siam turin Finance Minister chuan Chief Minister hi thurawn a lo pe a. Tun hnaia Union Finance Secretary hova State Finance leh Planning Secretary te nena meeting an neihah sawiho a nih thu leh an lo umzui zel tur thu a sawi bawk a ni. 

Chief Minister chuan HUDCO loan a leiba, ZIDCO leh a hmaa housing atana State-in a lo bat te chu Sawrkarin a theih anga rulh sak turin Pi Nirmala Sitharaman chu a ngen a, Union Finance Minister hian an lo ngaihtuah zui tur thu Chief Minister hnenah hian a sawi a ni. 15th Finance Commission-in Special Grant-a pek tura an recommend tawh Mizoram tana vaibelchhe 500 chuang, Union Finance Ministry in hman a remtih loh chin te chu remtihsak hram turin Chief Minister Pu Zoramthanga hian a ngen bawk a ni.

Chief Minister Pu Zoramthanga chuan Union Finance Minister nena meeting hlawk tak an nei chu lawmawm a tih thu sawiin beiseina sang tak a neih thu a sawi a ni.

Mizoram Chief Minister Pu Zoramthanga hi State Planning Board Vice Chairman Pu H. Rammawi, Adviser to Chief Minister (Technical) Pu K. Lalsawmvela, leh OSD to Chief Minister Pu Rosangzuala bakah Mizoram House Resident Commissioner Pu Amjad Tak ten an tawiawm a ni.