No.3213/2021-2022

Aizawl, 30th November, 2021 : Vawiin khan Chief Minister’s Conference Hall-ah Myanmar atanga raltlan lo lute (Refugee) chungchangah Consultation Meeting neih a ni. Meeting hi Pu J.C. Ramthanga, Addl. Chief Secretary to Chief Minister-in a kaihruai a. Meeting-ah hian Sawrkar official te, Task Group on Myanmar Refugees, Central YMA hruaitute leh Human Rights & Law Network aiawhte an tel a ni.

Meetingah hian Myanmar atanga refugee lo lutte chungchanga harsatna awmte leh hmalakna hrang hrang tarlan niin, duhthusam lo lai leh harsatna hrang hrangte awm mahse, Sawrkar leh tlawmngai pawl hrang hrangte thawhhona leh raltlante lo luhna khaw hrang hrang VC leh NGO te inpekna chu chhuanawm an tih thu tarlan a ni a. Raltlante pawhin tun thlengin harsatna lian tham an tawk lo ni a an hriat thu an sawi. Chutih rualin dan leh thupek kenkawh chungchangte, ruihhlo leh sualna hrang hrang lo piang theite uluk zawka vil zui a ngaih thu sawi lan a ni bawk. A tul ang zela Sawrkar leh NGO te Myanmar refugee chungchangah hian inrawn tlang zel tura tih a ni.