No.3212/2021-2022

Aizawl, the 30th November 2021: Mizoram Sorkar, Human Resource Development Board bultumin Pachhunga University College Mizo Department chuan ni hnih awh, Video Conference kaltlanga Mizo Tawng Zirhona, 'Mizo Tawng : Dinhmun leh Hmathlir' (International Webinar on Mizo Language : Status and Prospects) an buatsaih chu Mizoram Youth Commission Chairman, Dr. Vanlaltanpuia chuan nizan khan a hawng.

He zirhona hawngtu Dr. Vanlaltanpuia chuan, Mizo tawng chu humhalh a, tihhmasawn a nih zel theihna atan theihtawp chhuah a tul thu a sawi a. Mizoten Central service leh Civil service lama kan tlin tam theihna atan te, Mizo tawng humhalh zel a nih theihna atan te Mizo tawng chu India Danpui chhunga Eighth Schedule-a dah ve dan kawng zawn pawh a tul thu a sawi bawk.

Zirhonaah hian Prof. H.Lalthanzara, Principal, Pachhunga University College chuan Mizo tawng humhalh leh chawi nung tura Mizoram sorkar hmalakna chu fakawm a tih thu a sawi a. PUC Mizo Department chuan sorkar hmalakna hi theihtawpa tawiawm a, tha thawh zel turin tan a la reng a ni a ti a. PUC chuan an campus chu 'plastic hman lohna leh motor hmehrik (horn) hman lohna hmunah an puang a, hmun hring nuam tak a awm theihna atan tan an la mek tih a sawi bawk. PUC-ah hian India sorkar bultumin ramdangmi zirlai (foreign student) pahnih lai an awm tawh thu a sawi bawk a ni.

Mizo tawng zirhonaah hian tunlaia Mizo zinga tawng lama mithiam pathum - Dr. Rema Chhakchhuak, Ph.D (linguistics), Beifang Ethnic University, Ninxia, PR China, tuna New Delhi-a awm mek, Dr. Marina Ngursangzeli Behera, Research Tutor, Mphil stage Leader, Oxford Center for Mission Studies, Oxford, UK., Associate Researcher, Pretoria University, South Africa, Editor of Peer reviewed academic journal ‘Transformation’ leh Dr. Laltleipuii, Ph.D (Linguistics), ICFAI University ten Mizo tawng dinhmun te, a hmathlir te leh a pawimawhna te an sawi a ni.

He zirhonaah hian Mizo tawng hi hmangtu an tam tawkloh avangin humhalh a ngaih thu an sawi a. Tawng boral hlauhawm (endangered language) nia an sawi thin chu, tunah chuan mithiam ten tawng thang mek (thriving/rising language) a nih thu an sawi tawh a. Mahse la humhalh zel a ngaih thu an sawi hlawm. Chumi atan chuan Mizo tawng chu India danpui hnuaia sengluh a tul thu te, Mizo tawng siamthat leh herrem a ngaih thu te an sawi a. Sorkar-in Mizo tawng chu a hman uar deuh deuh a tul thu an sawi hlawm. Chutih rualin tawng dang thiam thei tura tan lak a, tawng pahnih aia tam hmang thei (multilingualism)-a luh a tul thu an sawi hlawm bawk a ni.