Chief Minister Pu Lal Thanhawla chuan vawiin khan Biate Water Supply Scheme tur lungphum Zialung Community Hall-ah a phum.

Chief minister chuan Biate khawtlangin tui hnianghnar tak nei turin a lung kan phum a, PHE Minister leh Engineer-te thawhrah a ni a ti. Chief Minister chuan Biate khua mipuiten thingpui chinga hlawhtling ber an ni thei chu a lawmawm hle a ni a ti a. In sum hailuhte pawh a tha hle a ni a ti a. Thingpui chin kawnga endik ngaite emaw, rampawn mithiamte rawih an ngai anih pawhin sorkar chu a inpeih reng a ni a ti bawk. Champhaia Grape chingtute pawh an grape chin quality endik turin Taiwan leh Korean mithiamte kohluh an nih thu a sawi a ni. Chief Minister chuan Biate khua chu faina lama aber an ni chu fakawm tiin tan la sauh sauh turin a fuih bawk a ni.

PHE Minister Pu Zodintluanga pawhin thusawiin, term hmasaah khaw hrang hrang Saiha, Lawngtlai, Tlabung, Saitual leh Khawzawlah te tui pekna siam anih thu leh kuminah hawn theih a beiseiawm thu a sawi a, Ramin hma a sawn dawn chuan hruaitu tha kan thlan thiam a tul a ni tiin, hemi dinhmunah chuan zoram chu kan vannei hle a ni a ti.

Bialtu MLA Pi Vanlalawmpuii Chawngthu pawhin thu sawiin, khuain kan nghahhlelh em em lungphum phum ani ta chu a lawmawm tak meuh a ni a ti a. PHE ten hna an thawh tak tak hunah Biate mipuite chu mipui tha nih i tum ang u a ti.

Biate Water Supply Scheme hi Union Ministry a North East tana 10 % Grant dah atanga Urban Ministry atanga Rs 13.64 Crore, kumin April thla a an rawn sanction atanga siam tur a ni a. Kumin 15th October khan PHE hnuaia hna thahnem tak lo thawk tawh thin, contractor Pu H.Sanga, Chanmari, Aizawl hnenah hlan a ni. Tui pekna tur hi treatment plant atanga Biate khua thleng pipe line thui zawng tur hi 6.7 Km a ni a. A hnaah hian civil work bakah electromechanical leh electrical work a awm ang. A hna hi kum 2 chhunga thawh zawh tur a ni a, thawh zawh anih hunah chuan nitin mi pakhat hnenah tui litre 130 pek theih tura ruahman a ni. he project hian mi 2619 chawm thei tura ruahman a ni bawk.

Lungphum phum inkhawm hi Pu R.Lalremkunga, Vice President, YMA Branch, Biate in a kaihruai a ni.