Mizoram Finance Commission hmasa ber office, Khatla a New Secretariat Complex chhunga All India Service (AIS) Officers’ Accomodation building ami chu vawiin khan Chief Minister Pu Lal Thanhawla chuan a hawng.

Chief Minister chuan Mizoram Finance Commission hi kum 2011 September thla atanga kalpui tan tawh anih thu sawiin, tunah chuan anihna ang tak, full time in hna a thawk thei tawh dawn a, thil thar lawmawm tak a ni a ti a. Central sorkar hotute duhsakna zarah 9th Central Finance Commission-ah member a dah alo nih tawh thu sawiin, central leh state ten sum an insem dan tur te,tax leh revenue an thawhchhuah tur te ngaihtuah thin a ni a ti a. Central Finance Commission 10-na in India Danpui article 74-na siam that anga thil thar a chhawpchhuahah, urban local bodies leh village council te hnena state in sum a bithliah dan tur a telhte sawiin, hei hian thuneihna inhlan chhawn chu a tum ber a ni a ti a. Sum leh pai insem dan te, chhiah thawhchhuah dan tur thleng a huap a ni a ti.

Chief Minister chuan keini pawh hmarchhak state thenkhat angin Indian Constitution article 243 M in Panchayati Raj leh a kaihhnawihte atangin min telhlo nachungin, Finance Commission neih ve a tha a hriain, a vawi khatna atan din ve a ni ta a. Hna chu an thawk nual tawh na in, tunah hian full time Chairman leh Secretary an awm tawh a, hna an thawk tak tak thei tawh dawn a ni a ti. An hmalakna turah chuan Aizawl Municipal Council a sum pek dan tur te, Autonomous District Council leh Village Council a sum pek dan turte a huam dawn a, report sorkarah an thehlut thin dawn a ni a ti.

Mizoram Finance Commission hian bula a tan chho dawn chauh a, office nghet pawh la neilo chungin an hnathawh dan hi kan lo thlir dawn a ni, Chief Minister chuan a ti a.Mahni intih ropui leh motor dawn lamah tlan lo a, buailo tura chahin, kan ram sum dinhmun harsatzia te hre reng chunga hna an thawh hi kan beisei dawn a ni a ti.

Chief Minister chuan corruption chungchang sawilangin, tunah hian a zung kan phawi chho mek zel a, a phoro chu court lam hna a ni a ti a. Chuvangin judiciary lam pawh hi fimkhur taka hna an thawh a ngai a ni a ti.

Finance Commission hnathawh tur ber chu Village Council te, Aizawl Municipal Council leh Autonomous District Council ten an mawhphurhna tha taka an hlenchhuah theihna atana State sorkarin sum a pek chhuah zat tur bithliah leh sum an insem dan tura rawtna siam te; sorkarin thil bik atana grant-in-aid a pek dan tur duan te leh sum leh pai dinhmun tha zawk an lo neih theihna tura rawtna siam te a ni ber a ni.

Chief Minister hian Mizoram Finance Commission website thar, http:/ /www.mizofincom.nin.in a tlangzarh nghal bawk a ni.

Hawnna inkhawm hi Pi Renu Sharma, Commissioner & Secretary, Finance in a kaihruai a, Ministers, Speaker, Parliamentary Secretaries te bakah sorkar hotu lian an kal tha hle a ni.

Mizoram Finance Commission hmasa ber ah hian Pu Van Hela Pachuau, IAS (Rtd) chu Chairman a ni a, Secretary chu Pu Lalthansanga, MFAS (Rtd) a ni.