India Toay in State tinte dinhmun zirchianna aneih thinah, Mizoram chu Investment-a state ti tha berah a puang a, vawiin khan India Today Chief Ministers Conclave vawi 10-na ah, lawmman te hi New Delhi-a Hyatt Regency-ah a semna hun buatsaih a ni a, Mizoram lawmman lak hi Chief Minister Pu Lal Thanhawla chuan a dawng a ni.

India Today Chief Ministers Conclave-ah hian Pu Lal Thanhawla chuan thusawiin, India Today Conclave of Chief Ministers vawi 10-naa a tel thei chu lawmawm tiin, India Today Group in lawmman hlu tak Mizoram hnenah a hlan chu a lawmawm tak zet a ni a ti a. Hmasawnna leh sorkar felfai nei thei tur hian vawi tam tak conference te, seminar te leh debate te neih thin a ni a, heti chung hian hmarchhak state ah chuan a taka hmasawnna hmuh tur a tamlo hle a ni a ti a. Hmarchhak hi hmun danglam bik, ami chengte pawh nunze hrang leh nunphung danglam nei, a leilung thlenga danglamna nei an nih avangin, abika project siam sak leh senso tur pawh hmun dang aia 25% vela tam zawka ruahman a tul thin a ni a ti a. Hmasawnna hrim hrimah hmarchhak state tam zawkte hi bul tan tlai bik an nih avanga state dangte umphalo an ni a ti.

Chief Minister chuan Mizoram sorkar-in mipui zawng zawng huapzo, hmasawnna programme leh ramngaw humhalha boruak tha siam turin NLUP a kalpui mek thu a sawi a. NLUP chu eizawnna nghet siamna tur anih bakah, mumal taka ram leilung hman anih nan te, ramngaw tih chereu tih tawpa, tlangram loneih bansanna tur anih thute leh ram hausakna haichhuahna tur a nih thute a tarlang a ni.

Chief Minister hi Mizoram House, New Delhi a Resident Commissioner Pu Dharmendra in a tawiawm a ni.