Chief Minister Pu Lal Thanhawla chuan vawiin khan Lal Thanhawla Auditoriumah ni 10-16 Feb 2016 chhunga hman tur Kangmei Ven Hapta, ‘Fire Prevention Week 2016’ chu a hawng. Kumina Kangmei Ven Hapta thupui atan ‘Ram Tikangtu - Ram Hmelma’ tih chu thlan a ni a, Kangmei ven hapta hriatrengna ‘Mascot’, kangmei chhuak lai leh sakhi tih chuanna ‘Khite-a’ tih chu hman ni bawkin, Mizoram chu India rama kangmei venna lama ‘mascot’ nei hmasa ber state a ni.

Chief Minister chuan kangmei ven hapta hman la ngai ta reng chu a tlawmngaihthlak zawk maha a hriat thu a sawi a. Ramngaw leh nungchate hi Pathianin mihringte nena inmamawh tawn tura min pek a ni a. A thil siam zawng zawng hnena chanchintha hril tur kan nih laiin, nunrawnna chhe ber kan lantir a, A thil duh loh zawng ber kan ti a ni a ti a. Kuminah kangmei venna kawngah leh ramngaw leh nungchate humhalhna lamah mitinin tha kan thawh theihna turin DC tinte chu hma la tura hriattir an ni chu a lawmawm hle a ni a ti a. Kohhran, tlawmngai pawl leh sorkar thawhhona tha tak a awm reng laia ram kan tikang nasa lutuk thin hi sim tur leh tan lakna tur kan la ngah hle a ni a ti.

Chief Minister chuan lo hal vanga ram kan tihkan mai piahlamah inthlahdah avang leh suahsual vang hrim hrima ram kang a awm thin a, ram hmelma kan nih lohna turin kangmei chhuak thei vena, a tikangtu tur awm te pawh vengtu nih tum turin mitin a chah a. Hetih laia ramngaw leh nungcha humhalh duh pawl an lo awm chho zel chu thil lawmawm tak a nih laiin, mi te zirtirtu ni awm zawk Aizawl pa ngei ten sava tam tak an kap thla thin tihthu hriat a ni chu pawi a tih thu sawiin, in siam that a hun hle a ni a ti. Chief Minister chuan kangmei ven hna kan thawhna a thlawna a awm loh nan theihtawp i chhuah zel ang u tiin miupuite a sawm a ni.

Hapta hawnna Chairman Pu Lalrinmawia Ralte, Minister of State for E&F chuan kalkhawmte lawmna thu sawiin, India ramah ram tikang nasa ber state kan ni tiin, hmarchhak state zinga kangmei chhuak zawng zawng hmun thuma thena hmun khat hi Mizorama kang a ni a ti a, a chhuanawm loh hle a ni a ti. Tuchhuan lokal leh zel turte tan ram nuam leh chenna tlak ram siam sak hi mitin mawhphurhna a ni a ti.

Pu Lalram Thanga, PCCF & Principal Secretary in report pein, India rama ram tikang nasa ber kan nih laiin, a venna lama hma la nasa ber kan nih thu a sawi a. Mei hi mihringten kan mamawh rualin chhiatna thlen thei a nih thu a sawi a. Chuvangin ram kang tur vennan State Level Fire Prevention Committee din a ni a ti a. Kangmei ven tulzia hi nasa leh zuala inzirtirin leh a puanzar hna uar zawka kalpui tul a tih thu a sawi. Kangmei ven hna phur taka thawh a nih theihna turin sorkarin ‘incentive award’ district leh village levelah a ti tha pathumna thleng siam anih thu tarlangin, pakhatna in Rs.50,000/-, pahnihna in Rs.30,000/- leh pathumna in Rs.20,000/- an dawng thei dawn a ni a ti. Kumin atang hian ngaihtuah bik, ‘focus’ neiin kan kal tawh ang a ti.