Chief Minister Pu Lal Thanhawla chuan vawiin chawhnu khan Zemabawk Lungbial vengah Mission Foundation Movement (MFM) ina din Laithangpuii College of Pharmacy a hawng.

Chief Minister chuan Mission Foundation Movementin Pathian rinchhana a din, Laithangpuii College of Pharmacy hawn theih a ni chu hmasawnna rahbi pawimawh tak a ni a ti a. MFM chhungkua nen inkungkaihna rei tak an neih tawh thu sawiin, Pathian rinchhan tak taka kal an ni chu Pathianin an thil tumah hlawhtlinna a pe chho zel anih tih college hawn hian a tichiang a ni a ti a. Rinna ah chuan te lua awm lovin kal ho theih vek a ni a ti a. Mizote hi hriselna lamah kan hnufual bik hle a a hriat thu sawiin, Pu Hawla chuan ringtu kan nih angin hrisel ber hnam ni awm tak, cancer vei tam ber hnam kan ni hi a vanduaithlak a ni a ti a. Chuvangin kan ei leh inah fimkhur a, zuk leh hmuamah kan fihlim a tul a ni a ti. Hriselna lam hawia ke kan pen a hun tawh tak zet a ni a ti a. Hei hi intodelhna kawnga hmalaknaah awmze neiin kan taimaknate pawh kan chhawr tangkai thei a ni a ti.

Chief Minister chuan Medical College kan neih ve tur chungchang sawiin, hun rei vak loah Falkawn Referral Hospitalah ziralai 50 a bul tan tum a ni a ti a, a hotu Director tur pawh dap mek a ni a ti.

Laithangpuii College of Pharmacy hi MFM hian din turin kum 2012 atang khan hma a la a. Kum 2013 khan Mizoram sorkar chuan din phalna pein, Central sorkar hnuaia Pharmacy Council of India ah final permission dilin, an ni hian a hmunah rawn endikin March thla 2014 khan seat 60 awm theihna tur phalna a rawn pe ta a ni. PCI ah hian kumtin affilliation fee Rs.50,000/- pek thin a ngai dawn a. Pharmacy zir tur hi diploma course a ni dawn a, zir hun chhung hi kum hnih a ni ang. Plus 12 Science zirzo tan zir theih a ni bawk ang.

College hi Mizoram Higher & Technical department hnuaia in register a ni a, examte pawh H &TE in conduct tur a ni dawn a ni. Tun dinhmunah hian teaching staff Principal leh Lecturer 6 leh non teaching staff 3 an awm mek a, zirlai 34 awm bawkin kumin 2014 August thla atang khan class neih tan a ni. Zirlaite hian kum khatah zirna man Rs.50,000/- an chawi ve angai dawn bawk a ni.

MFM hian an indin tirh, kum 2012 atanga Pu P.Lalthara building Bawngkawnah man chawi lova luah tir an nih avangin College hi Pu P.Lalthara nu Laithangpuii hmingchawia din a ni. Hawnna inkhawm hi MFM Vice Chairman Pu F.Malsawma’n a kaihruai a ni.