Vawiin khan Education Parliamentary Secretary Pu Joseph Lalhimpuia chuan Govt. Higher Secondary School, Lunglei-ah ICT School Scheme hnuaia ‘Smart Classroom’ chu a hawng a. SCERT Director Pi Malsawmthangi chuan Lunglei GHSS tana ‘wheelchair ramp’ siam thar chu a hawng nghal bawk.

Lunglei HSS Principal Pi C.Lalthangpuii-in kalkhawmte lawmna thu a sawi hnuah Parliamentary Secretary Pu Joseph Lalhimpuia chuan thu sawi zuiin Lunglei HSS a tlawh hmasak ber tuma amah pangpar lo petu zirlai naupang kea kal thei lo khan thu takin a rilru a khawih avanga vawiina wheelchair ramp thar hawn tak hi a lo irhchhuak a ni, a ti a. Information Technology khawvelah kan chen tawh avangin Sorkar Laipui chuan ICT School Scheme hnuaiah Mizoram atan ‘Smart Classroom’ 4 neih a phalsak zingah Lunglei Govt HSS-ah a hmasa ber tur hawn a ni thei ta chu a lawmawm hle a ni, a ti bawk. Pu Joseph lalhimpuia chuan zirna inte chu ‘Child Care Centre’ ni thei se a duh thu sawiin school building tha pui pui leh hmaraw changkang ber ber pawh nei maila naupang tha kan chherchhuah chuan loh chuan awmzia a awm lo a ni, a ti.

SCERT Director Pi Malsawmthangi pawhin thu sawiin kum thar atang chuan Class I-IV ten NCERT textbook an zir tawh dawn tih a sawi a; kum naupang zawkte tan Mizoram school thlan bik 148-ah Pre-School tan a nih tur thu a sawi bawk.

Vawiina ‘wheelchair ramp’ hawn tak hi 88.5 x 6 ft. zeta sei a ni a; a siam nan hian Central norms-in a phal chin Rs.36,00/- bakah SCERT leh RMSA tangkawp sum Rs.2.6 lakhs hman belh a ni. ‘Wheelchair ramp’ chhawr tangkai tur GHSS zirlai naupang Joan Laldinpuii nu leh pate chuan lawmthu sawina atan vawiina hawnna inkhawma a hmun cheina zawng zawng an rawn tum nghe nghe a ni. Smart Classroom atan hian Computer (+ accessories) 30 dah a ni a, zirlaiten an hman nghal theih turin engkim peihfel a ni tawh a ni.

Attachment

  • Loading attachment...