1782/2023-2024

Dated Thenzawl, the 7th September, 2023: Vawiin khan Chief Minister Pu Zoramthanga chuan Mizo Students' Union General Conference vawi 21 na, vantlang inkhawm Thenzawl Auditorium a buatsaih chu khuallian niin a telpui.

MSU Magazine 'Kulva' a tlangzarh zawhah thusawiin Chief Minister chuan, zirlai naupang hmel duhawm tak tak, zirna piah lama ram leh hnam hmangaihna thinlung pu hetiang zat kalkhawm ka hmu che u hi a thlamuanthlak ka ti a. Kan chhehvela harsatna thlengte avanga lokal kan unaute tana in hnathawh hmutute kan ni a, in thiltihte hi a chhuanawm a ni, a ti. Mizoramin buaina a tawh zual vanglaia thlamuang taka kan awm theihna hmun East Pakistan kan luh laia kan thlamuanzia kha sawifiah thiam a har hle a, lungmuanga zan khat mut kha a thlakhlelhawm em em a ni. Chutiang chiah chuan tun hnaia kan chhehvela buaina leh harsatna tawk kan unauten thlamuang taka mutmu an tuaha, an nitin nun an hman theihna tur Mizoram an rawn pan leh; an beisei ang ngei a ralmuanga an awm mek hi a hlu em em a ni. Chutiang lo tihsak thei ram, khawvela ram ralmuang ber te zinga mi Mizoram neitu kan ni hi a hlutzia i ngaihtuah thin ang u, buaina namenlo paltlang hnua ram ralmuang lo ni ta- Mizoram huhang hi a na em em a ni. Kan neih ang remna leh muanna tluantling neih ve theih beiseiin kan thenawm state leh ramten Mizoram lam hi an rawn hawi thin a, Aizawl hi an rawn be pawp thin. Mizoram huhang zar pawh kan zo tlang chho zela, kan la zo chho zel dawn a ni, a ti a. Tun hnaia zofate thlavang hauh nana Mizoram hmalakna tlangpui tarlangin, he ram leh hnam chhan nan hian tu lakah mah 'dawih aw' kan chhuah thiang lova, kan chhuah ngai hek lovang, a ti bawk. Buai laia huaisen taka mipuite tana zirlai pawlin hma a lak thinzia te kha theihngilh theihna ni tawh lo. Ram tana huaisen taka lo bei tawhtute hnung kha lo zui zel ula, he ram he hnam Pathian min pek hi hmangaih takin i enkawl ang u, tiin zirlai kalkhawmte a sawm a ni.

The Ladies Organisation te chuan Myanmar atanga raltlante hmangaih leh duat taka Mizoramin a lo tuamhlawm avanga an lawmzia tarlanna 'Lehkhapui' (Citation) mawi tak Chief Minister hnenah leh Central YMA hnenah an hlan a ni.

He huna khualzahawm Pu Robert Romawia Royte, Minister pawhin thusawiin, Tourism Department Hall tharah Mizo Students' Union ten khawmpui an hman avangin lawmthu a sawi a. Tourism Department hian Thenzawlah vek hian Golf Course a nei a, tun tuma kalkhawm zirlai naupang a tlawh duhte chu a man zatvein an tlawm dawn tih a sawi a ni. Mizoram leh India sawrkar inremna (peace accord) thuthlung kha a hlu em em a, hmasawnna duhawm tak tak kan hmuh chhoh zel bakah Article 371G hnuaiah kan hnam kan ram hi ven tlat kan ni. Hei hian kan hruaitu hmasa te lo finzia leh ram an hmangaihna thukzia a tifiah hle. Khatiang thinlung kha puin vawiina thalai rualte hian ram leh hnam hmangaihna rilru i pu zel ang u, a ti.

Mizo Students' Union General Conference vawi 21 na hi nimin atanga neih tan a ni a. Naktuk thleng a awh ang. Vawiin vantlang inkhawm hi Lalramhluna Fanai, General Secretary in a kaihruai a, Pastor Lalrinchhana, IKK, Thenzawl bialtuin hunserh a hmang a, MSU General Headquarters President Samuel Zoramthanpuia leh Central YMA President Pu R. Lalngheta ten thu a sawi bakah sawm bik midangten thusawina hun an hmang a, MSU Life Member hlanna te neih a nih bakah hnam lam chi hrang hrang entirna te buatsaih niin zaithiamten hun an hmang bawk.