1781/2023-2024

Mamit 7th September, 2023 : Vawiin khan Mamit Venghlun-ah PANCHAYAT BHAWAN (VC House) chu Er.H.Lalzirliana Mamit Bialtu MLA chuan a hâwng.

Er. H.Lalzirliana chuan Mamit Venghlun VC te'n House tha tak mai an nei ta chu a lawmpui thu a sawi a.Thawhhona tha nena VC te'n khawtlang an enkawl chuan veng leh khawtlangin hma a sawn phah thin a ni tiin hmasawnna nei zêl tura hma la turin VC- te a chah a, rorelna tha hnuaiah vantlang nun a nuam thin a, chu chuan khawtlang inlungrualna leh hmasawnna tam tak a thlen thin thu a sawi.

MLA chuan Mamit bialtu MLA a nih phat atanga bialchhung khawtin tlawhkual nghalin khawtlangin mamawh kan lo nghah hle a ni a ti, Vantlang mamawh thil chi hrang hrang Community Hall, VC House, NGO hrang hrang YMA, MHIP, MUP te'n mamawh kan lo nghah hle a, chung kan mamawhte tihlawhtling tur chuan a thei ang angin hma kan la ve a, a hlawhtlinna pawh hmuh nual a ni a ti. Mamit khawpui chhungah pawh VC House la neilo deuh vek kan ni a, Mamit khua bikah VC House thar pathum puitlin a ni ta chu a lawmawm hle a ni a ti bawk. Bialchhung hmun hrang hrangah, Community Hall, VC House, YMA Committee Room, MUP In, MHIP In te sak tawh a nih thu a tarlang bawk.

Venghlun VC House hâwnna Programme hi Pu Lalchhandama, Venghlun VCP chuan a kaihruaia, Pu C.Rochhinga DLAO Mamit bakah khawtlang aiawhte'n thusawina an nei a ni.

Er.H. Lalzirliana, Bialtu MLA hian Venghlun VC-te mamawha hman atan Computer Set a pe bawk.

Mamit Venghlun hian kum 2006 a tang khan VC inrelbawlna hran an nei tan a, tûnah hian VC Member panga(5) awm mekin, chenna In 350 vel a awm a. Mihring hi 1500 bawr vel an chêng mek bawk a ni.