1891/2023-2024

Dated Aizawl, the 15th September, 2023: Vawiin khan Chief Minister Pu Zoramthanga chuan Mizoram Engineering Service Association (MESA) Annual General Conference vawi 42 na, Berawtlang Multipurpose Hall a buatsaih chu khuallian niin a hmanpui.

MESA Souvenir a tlangzarh zawhah thusawiin Chief Minister chuan, Engineer kalkhwmte duhsakna a hlan a. Kan ramin hma a sawnna tura a sulsutute leh a taka thawktute in ni a, hmun pawimawh tak luahtu leh mawhphurhna pawimawh tak chelhtute in ni. Hna lak belh in mamawhna in tarlan te hi kan hriatpui che u a, Service dangten an mamawhna te pawh kan hriatpui hlawm a ni. Kan hriat vek angin sawrkar hian sum leh pai harsatna nasa tak a tawk a, covid19 hripui vang khan tun kum thum chhung hian Central sawrkarin min pek theih tura an ngaih, budget-a dah tura min tih vek tawh; min pek theih leh tak loh hi vaibelchhe 3500 vel a tling phak a ni. Chutiang harsatna chuan min delh avangin sawrkar hna lakah leh kawng dangah pawh kan duh leh tum angin kan kal thei rih lova, hei hi kan inhriatpui a tul hle a, kan beisei lawk loh harsatnain min chim nasa a ni. Pathianin min khawngaiha hun tha kan nei leh a nih chuan kan beisei leh tum ang takin a tul apiangah nasa zawkin kan la thawk zel dawn a ni. Tun hnaia kan ramin harsatna a tawh hrang hrangte hian mahni kea din a pawimawhzia min zirtir a, Pathianin ram tha tak min pe a, kan leilung, boruak leh tuihna te, lei hnuai hausakna chenin mal min sawm nasa hle. He ram thatna haichhuak a, hmang tangkai a, mahni intodelh rama chantir turin Engineer ten tam takin mawh kan phur a ni tih kan rilruah awm reng ka duh hle a ni. Vawi leh khatah sang taka thlen theih ni lo mahse hmathlir fel tak nei chunga hma kan lak a pawimawh thin. Kan hmabak awm mek hi kan Engineer ten keimahni zawnah chonaah ngai ila, midangte pawhin mahni hmazawnah theuh i bei sauh sauh ang u, kan ram tung ding tur hian kan kovah mawhphurhna a awm theuh a ni, a ti.

Vawiin inkhawm hi Er. H. Zoramliana, Vice President, MESA in a kaihruai a, palaite lawmna thu Er. Lalropuia, President in sawiin annual report Er. Benjamin L. Tlumtea, General Secretary chuan a pe a ni. Vawiin hi National Engineers Day a nih bawk angin day thuchah Er. Lalrinmawia, Secretary, Information & Publicity chuan a sawi bawk. Inkhawmah hian an member pension mi 12 thlahna te, an Golden Jubilee an lawm mek kharna te an neih bakah tun hnaia an member boral mi pasarih te sunna hun an hmang a ni.

MESA hi kum 1972 khan member pariat chauh neiin an ding tan a, tunah hian active Member PWD ah 144, P&ED ah 73, PHED ah 67 leh I&WRD ah 16, an vaiin 332 an awm a, life member te nen chuan member 363 an awm mek a ni.