Mizoram State Sports Council (MSSC) kum 40 tlin, Ruby Jubilee lawmna Chief Minister Pu Lal Thanhawla’n hmanpuiin, Mualpuia R.Dengthuama Indoor Stadium (Multi Purpose Indoor Hall) a hawng nghal.

MSSC kum sawmli tlin lawmna leh Indoor Stadium hawn inkhawm Indoor Stadium chhunga neihah Chief Minister chuan MSSC in kum 40 a hmang ve ta chu a lawmawm hle a ni tiin, hemi hun chhung hian Mizoramin infiamna lamah nasa takin hmasawnna a nei a ni a ti a. A din tirh atanga hruaitu lo ni tawh engemawzah ruby jubilee lawmnaa an tel thei chu a lawmawm hle a ni a ti a. Chief Minister chuan tunlai khawvelah thalai 50% aia tam an awm a, an pawimawhna te sorkarin hriain, an tan khawvel thar siam turin zirna leh infiamna lamah hma ala reng a ni a ti a. Hmarchhak bialah Mizoram chu sports infrastructure nei tha berte zingah a tel pha tawh a ni a ti a. Heng infiamna ruhrel dinte hi thalaite khua leh tui tha an nih theihna hmanraw pawimawh tak a ni tiin, khawvela Mizote kan inpho chhuah theihna pawimawh tak a ni a ti.

Chief Minister chuan footballah chuan FIFA in Mizoram chu football factory tha tak a ni an ti tiin, tiang zela kan kal chhoh chuan khawvel hi kan hneh thei dawn a ni a ti a. Chumi ti thei tur chuan kan chhung lam leh pawnlam nun kan in uluk hle a ngai a ni a ti a. Sports administrator te pawh entawn tlaka an nun an uluk a pawimawh hle a ni a ti. Chief Minister chuan sports infrastructure kan neihte hi kan uluk a kan duat hle a pawimawh tih kan hriat a tha tiin,a hmanna tur dik takah chauh hman kan tum tur a ni a ti. Heng kan sports infrastructure te hi kan ram tihmingthatu ni turin dim tak chunga kan hman tangkai a tul a ni a ti.

Chief Minister chuan he Indoor Stadium sakna hmun petu Pu R.Dengthuama chhungte hnenah lawmthu a sawi bawk a ni.

Inkhawm chairman Pu Zodintluanga, Sports Minister & President, MSSC chuan kan thalaite an vannei hle a ni tihthu sawiin, infiamnaa hmasawn tur chuan a ruhrel (infrastructure) din hmasak a tul tih sorkarin hriain, discipline tam takah Chief Minister kaihhruainain hmalak nghal char char a ni a ti a. Chuvangin kan thalaite hi sorkarin an talent haichhuak turin a cho a ni a ti.

MSSC hi ni 20 April 1976 khan din a ni a, tunah hian President 17na, Pu Zodintlauanga’n a kaihruai mek a, President hmasa ber Pu H.Thansanga, Ex-Minister pawh kum 40 tlin lawmnaah hian telin, hruaitu dang engemawzah an tel bawk a ni. MSSC hian sports association hrang hrang 31 leh district pariat a enkawl mek a ni.

R.Dengthuama Indoor stadium sak nan hian Urban Sports Infrastructure Scheme atangin Rs.600 lakhs sanction niin, Special Plan Assistant atangin Rs.150 lakhs hmuh a ni bawk a, work order erawhchu Rs.749.95 lakhs a ni. MSSC enkawlna hnuaiah sak niin, a satu hi contractor Pu R.Sangkhuma, Khatla a ni a, ni 8 June 2012 ah sa tannin, ni 23 April 2015 khan zawh fel a ni. Stadium hi a dung 60 metres leh avang 40 metres a ni a, international level thleng khelh theih tura ruahman a ni. Ground floorah hian air rifles shooting gallery siam a ni a,practice room 3, chowkidar quarter, inthiarna 9, bualin 6 dah a ni. First floorah hian inkhelhna hmun playing area 49 metres leh 28 metres a zau a awm a, dressing room 2, restaurant 2, ticket counter 3, medical room, waiting room leh inthiarna 13 a awm bawk a ni. Second floor hi gallery atan siam a ni a, mi 1100 vel leng thei tura ruahman a ni a, asir kil tinah inthiarna, ekin 20 leh zunin 25 dah a ni bawk.

Stadium hawnna inkhawmah hian Minister leh MLA te bakah official thahnemtak an tel a ni.