Vawiin khan Lunglei DC Pu Abhijit Vijay Chaudhari hovin Lunglei-a sorkar deaprtment hrang hrang hotuten sorkar laipuiin a kalpui mek e-governance hnuaia ruahmanna chi khat ‘SBI e-payment’ chungchang zirhovin Lunglei Circuit House Conference hall-ah an thukhawm a. E-payment chungchang hrilhfiah turin Guwahati leh Aizawl atangin SBI officials te lo kalin, sorkar department ten e-payment an hman theih dan tur leh a that zawkna an sawiho.

AGM (Govt Banking Unit) SBI, Guwahati Pu Dipendu Dev chuan sorkar department hrang hranga thawkte hlawh bakah department revenue lakluhna leh an sum pekchhuah tur thlengin e-payment hmanga tih chu a a felfaiin a him a, a langtlang zawk thu a sawi a. Sorkar laipui pawhin nasa takin rampumah digitilisation a kalpui mekah sorkar sum chevel chu e-payment hmanga tih tura ruahman chho mek a ni, a ti. Heng e-payment hmanga sum khawih chet hi sorkar department tan chauh ni lovin mimal tan pawh ruahman chho zel dawn a nih thu a sawi bawk.

Lunglei DC Pu Abhijit Chaudhari leh officials kalkhawmten Lunglei-ah internet connection mumal vak loh thin thu sawiin e-paymnent ti thei tur chuan tanlak a ngai hle ang a, BSNL leh Service Providers dangte tihchaka anmahni nen pawha thawhho dan tur sawiho a pawimawh thu a tarlang.

Vawiina meeting-a SBI officials dang lo telte chu : Pu Anil Sharma, Manager ITS; Pu Khoyodot Kanti REang, CMP SME; Pu Avik Ghosh, Asst Manager, GBU leh Pu H.Lalhlimpuia, Dy. Manager (Alt Channel-RBO) an ni.