W.Phaileng SDO(Civil), Pu Lalvenhima MCS chuan a pisa ah vawiin khan W.Phaileng khawchhunga Sorkar Department hrang hrang hotute leh Khawtlang hruaitute thingpui inhona neihpui pahin a kawm.

Vawiin inkawm honaah hian W.Phaileng Civil Sub-Division tih hmasawn dan turte rel ho in sub-division chhunga hmalakna chi hrang hrangte an thlir ho a. He hunah hian W.Phaileng Khawchhung vawn thianghlim dan turte, dan leh thupek kenkawh lama hmasawn dan turte, Civil Sub-Division Office tih changtlun dan turte bakah Department hrang hrang hmalaknate leh hmachhawpte an thlir ho a. Hei bakah hian kum 2018-a W.Phaileng khua in khawmpui lian KTP General Conference a hmachhawn tura Sorkar lam lo inbuatsaih ve theihna tur awmte an sawiho bawk.

Pu Lalvenhima chuan Department hrang hrang hotute chu furpui kan hmachhawn turah mahni Department chan theuh tal buai lohna tura ruahmanna siam fel tur a chahin, mahni hnathawhna hmun theuhah awm tha turin a chah a ni.

W.Phaileng SDO(Civil) Office hian tunah hian thawktu Assistant grade pakhat leh MR pahnih an nei mek a ni.