Pi L Tochhawng State Election Commissioner kaihhruai na in vawiin khan a office ah Aizawl leh Kolasib hmun thenkhata By-Election neih mai tur chungchang sawi hovin Special meeting pawimawh tak neih a ni a. Pu H.Darzik,a Secretary,State Election Commission bakah Aizawl leh Kolasib Deputy Commissioner te, Superintendent of Police te bakah political party hrang hrang aiawh hruaitute an tel kim a ni.

Nikum April ni 30 a Village Councils General Election neih a nih khan engkim peihfel vek a,sum sen ngai te sen vek a nih hnuah remchan lohna avangin Aizawl District huamchhung khaw 25 leh Kolasib District huamchhung khaw 6-ah inthlanna neih a nih tak loh thu sawiin Pi L Tochhawng chuan tunah sawrkarin inthlanna neih theih nan boruak a muanawm thu Commission an hriattir a. SEC chuan May 19,2016 ah inthlanna nei tura inbuatsaihna an kalpui mek thu leh District lam thawktu te nen pawh thawhhona tha tak neiin tunah hian a vawrtawp an thleng mek tih a sawi a ni.

VC General Election 2015 neih a nih khan Electoral Roll siam vek a ni a, mahse tunah kum khat lai a lo liam leh hman avangin inthlanna Dan in a phut angin Electoral Roll siam thar leh vek a ngai a. January 1,2016 chu kumtling chhiar nan hman a ni a, MLA Electoral Roll thar ber chu Draft Roll-ah hmangin chu draft roll chu March 21,2016 ah tarchhuah a ni a. Final Roll chu April 8,2016-ah peih a nih thu sawiin State Election Commissioner chuan Aizawl ah nikum aiin voter 308 in an pung a, household 194 in an pung bawk a, Kolasib ah erawh a ngai chiah a la ni, a ti a. Tun tum By-Election ah hian Aizawl District VC 25 ah hian General Seat 72 leh Reserved Seat 27 a vaiin seat 99 leh Kolasib District VC 6 ah General Seat 20 leh Reserved Seat 6, a vaiin seat 26 thlan tur a nih thu a sawi bawk.

Inthlanna felfai leh thianghlim neih a nih theih nan Model Code of Conduct buatsaih a ni a, hei hi inthlanna neihna hmun Constituency-ah te chauh hman tur a ni a. District pumpui a huam loh thu Pi L Tochhawng chuan sawiin inthlanna tur atan hian mawhphurtu hrang hrang inruat peih fel vek tawh in boruak muanawm taka inthlan a nih theih nan venhimna lam dinhmun hriatchian a tul a, chu chu vawiina kalkhawm hoten an sawiho tur pawimawh tak te zinga mi a ni, a ti. VC inthlanna tluang taka neih a nih theih nan rilru a vei zawng leh rawtna an neih te sawiho a ngaih thu Pi L Tochhawng chuan tarlangin member-te hian venhimna chungchang bakah lirthei ruahman dan hrang hrang te an sawiho zui nghal a ni.

Tun tum VC inthlanah hian ballot paper hman tur a ni a, ballot paper ah chuan Party inang chu hmun khatah an awm ang a, Reserved seat te pawh hmun khatah dah an ni bawk ang. Inthlan result hi May ni 19, 2016 ah chhiar nghal tur a ni.