Mizoram sorkar hnuaia Muster Roll (MR) a thawk ten an hlawh sorkarin a tihsan sak avanga lawmthu sawina vawiina Special Assembly, Vanapa Hall-a Trade Union Joint Action Committee (INTUM & FOMTU) in a buatsaih chu Chief Minister Pu Lal Thanhawla chuan a hmanpui.

Chief Minister chuan MR hnathawk ten lawm nachang an hria chu Pathian duh zawng a ni a, malsawmna tam zawk an dawn a beiseipui a ni a ti a. Lawmthu sawina buatsaihah chawimawina an siam chu a ropui hle a ni a ti. Hnathawktu kalkhawm kan ni a, sorkar hna kan thawh hian a lian leh te awm chuang loin kan thawhna zawn theuh hi a pawimawh vek a, rinawmna, dikna, taimakna leh Pathian tihna nen kan kal a tul a ni a ti a. Mizoram mipui nuai sawm awrh zingah mi singruk vel chu sorkar hnathawk, thlakip hlawh neite an ni a, an vannei bik hle a ni tiin, lungawi hle tur an ni a ti.

Chief Minister chuan MR hnathawk kalkhawmte lawmna chu a famkim lo mai thei tiin, an ni aia a leta hlawh la tamte pawh an lungawi chuanglo a ni a ti a. Chuvangin lungawi lohna te siam fel turin sorkar chuan theihtawp a chhuah reng a, amaherawhchu a pawimawh ber sum kan harsat avangin a hmuhna tur kawng a dap reng a ni a ti a. Hemi tur hian power hnianghnar taka kan neih theihna turte, kuthnathawktute tharchhuah man man zawka hralhna tur dap sakte, ramdang nena insumdawn tawnna lamah te, NLUP hmanga mi harsate khaichhuah te leh kawngpui tha siamna ah te nasa takin hmalak a nih thu a sawi a ni.

Chief Minister chuan Mizoram ah labour law leh administration kan la nei thalo tih sawiin, sorkar hna lian thawkte pawhin an la hre vaklo (aware lo) nia a hriat thu a sawi a. Labour law eng engemaw siam a, labour court hial pawh siam ala tul thei a ni a ti a. Professional tax chungchang a sawiah Chief Minister chuan sorkar hna lian leh te thawk ten professional tax inzata an pek thin thu ah professional tax hi central law anih avangin central sorkarah thlen anih thu a sawi a, siam tha turin Parliament pawmpuina a tul a rin thu a sawi bawk a ni.

Khualzahawm Pu Lalrinliana Sailo, Labour Minister chuan sorkar hnuaia MR hnathawktute tan bung thar chuankaina a ni a ti a. Hlawh tihsan sak an nih thu ah thinlung takin an lawm nia a hriat thu sawiin, a lawmpui thu a hrilh a. An sorkar chhungin minimum wages hi tum thum an siam tha a ni a ti.

Assembly buatsaihtute hian lawmthu sawina thuziak citation Pu Lal Thanhawla leh Pu Lalrinliana Sailo te hnenah hian an hlan bawk a ni.

MR te hlawh thar hi Variable Dearness Allowance leh 25% of Wages hmanga tihsan a ni a, chutiang chuan hlawh thar chu Unskilled Labourin nitin Rs.220/-, Semi Skilledin Rs.250/-, Skilled II in Rs.310/- leh Skilled I in Rs.380/- a ni a, thla leh October 2013 atang hian an la nghal thei dawn a ni.

Trade Union JAC Chairman Pu C.Malsawma’n Assembly hi a kaihruai a ni.