Champhai District khaw hrang hrang tlawha zin Chief Minister Pu Lal Thanhawla chuan nimin khan Rabung a tlawh a, nizan vek khan Aizawl a thleng leh a ni.

Rabung khua mipuite hian Chief Minister Pu Lal Thanhawla hi ropui takin a khaw nawtin an lo hmuak a, an khaw VCP Pu K.Sangsiama kaihhruaina hnuaiah Bung kawttualah amah lawmna vantlang inkhawm buatsaih a ni.

Chief Minister chuan Mizote hi ringtu kan ni a, kan thil tihte a hlawhtlin theihna turin Pathian lamah kan tan hmasak angai a, remna leh muanna kan kalpuite kha Pathian lam tang anih avangin min hlawhtlin tir a ni a ti. Tuna kan flagship programme NLUP pawh hi Pathian lam tang programme a ni a, chuvangin a dawngtute pawhin Pathian malsawmna a ni tih hriain an chhan letnaah pawh rinawmna, dikna, taimakna leh Pathian tihna nung nen an kalpui angai a ni a ti. NLUP hi milian leh mi hausa te tan anih loh thu sawi nawnin, Chief Minister chuan mi hausa leh retheite inkar tih zim nan mirethei, kuthnathawktute, pachhiate leh chhumchhiate chhanchhuahna tur a ni a ti a. Heng mite hian ei leh barah leh sum leh paiahte an intodelhna tura rahbi tuk sakna tur a ni a ti a. Chuvangin cheng khat pawh a bo a thianglo a ni a ti. A hlawhtlinna chu a dawngtute mawh a ni a ti.

Chief Minister chuan term lehah an awmlo palh anih pawhin NLUP dawng tawhte leh la dawng turte enkawlzuina turin leh tihchhiata an awm lohna turin a hungna tur ‘exit protocol’ pawh siam fel tawh a ni a ti a. Tuna dawng leh tur thlan fel tawh, sum la pek lohna chhan chu sum awm loh vang niloin line departmenta thawktute indaih loh vang a nih thu a sawi a. Amaherawhchu inthlan hmain dawng tur thlan tawhte chu dawn tir hman vek tum a ni a ti.

Chief Minister chuan Mizoram  hmasawnna tura sorkar hmalakna tam tak a sawi a. Hmasawnna tura a hnuk pawimawh powerah, Tuirial project sorkar hmasain kuttlingloa sum lak pawisak loh avanga tluchhe lailet der chu tinung lehin kum 2014 chuan hman theih a beiseiawm thute, Tuivai 210 MW pechhuak thei tur central sorkar sensoa siam tur pawh peih fel tep anih thu te, Myanmar ram kaltlanga Bay of Bengala chhuahka kan neihna tura kawngpui siam mekte leh a dang tam tak thalaite tana infiamna lam leh zirna sang zawk an zir theihna tura hmalaknate a sawilang a. Corruption chungchangah sorkar sum eiruk ringawt hi corruption anih loh thu leh tih tur ti loa, tih loh tur tihte hi corruption anih vek thu te a sawi a ni.

Kum 2008 inthlana Mizo mipuite tawngtai chhanna an nih thute sawiin, Pu Lal Thanhawla chuan   tawngtainaa an dil, sorkar tha, sorkar fel leh sorkar dik a awm theihna tura fimkhur tak leh lepse ngama an kal thu leh bang loa an tawngtaipui na avangtea tun hi thleng thei an nih thu a sawi a. Rabung mipui ten sorkar hmalaknaah lawm nachang hriaa an sorkar leh ngei an beiseipui avangin Chief Minister chuan an hnenah lawmthu a sawi a. Bung hnuaia hahchawlhna tur sak sak a tiam bawk a ni.

Chief Minister tawiawmtu Pu Zodintluanga, ICT Minister chuan miretheite dawmkan nana miretheite thleng phak Chief Minister rintlak lek leh chak kaihhruainaa programme kalpui mekah hmasawnna hmuh tur tam tak a awm thu a sawi bawk a ni.

Vantlang inkhawm hi bialtu MLA Pu T.T.Zothasanga’n lawmthu sawiin hun hi tih tawp a ni.