Mizoram Chief Minister Pu Lal Thanhawla chuan vawiin chawhnu khan Serchhip D.C Conference Hall-ah Serchhip District chhunga infiammi Mizoram tihming tha tu mi 17 hnenah lawmman tangka fai Rs. 1,05,000/- a sem.

Chief Minister chuan Mizo thalaite tan khawvel thar siam an tumna kawngah infiamna hi an ngaihpawimawh ber pakhat anih thu sawiin Sports Minister leh Department a thawktu te thahnemngaihna avangin nasa takin hmasawnna hmuh tur a awm a ni a ti a, hmunpui lam atang pawhin Mizorama infiammite talent hai chhuah tur a tam tih an hriat tawh avangin an rawn ngaihven nasa a ni a ti a, Mizoram Sawrkar chuan Olympic Vision-2016 hmachhuanin kum 2016 Rio Olympic-a Mizo thalaite tirh ngei tumin tan an la mek ani tih a sawi bawk.

Infiammite chawh phurna atan leh an kal zelna kawnga fuihna atan “The Mizoram Sports Incentive Cash Award 2001” duan chhuah a ni a, he scheme atang hian International leh Nationa level bakah Mizoram hminga infiammi fehchhuakte (Individual leh Team events) Gold Medal, Silver Medal leh Bronze Medal dawng phate hnenah chawimawina tangka fai pek thin an ni a, vawiina infiammi lawmman pek te hi kum 2010-2011 chhung a hlawhtlinna hmu te an ni a, sports discipline paruk – Badminton, Football, Muay Thai, Taekwondo, Wrestling leh Wushu atangin an dawng a ni.