NLUP Chief Media Officer, Pu David L. Thangliana chuan nimin khan Serchhip leh a chheh vela NLUP hmalaknaa hlawhtlingte hnathawh hrang hrang a hmunah a rawn enfiah.

NLUP Chief Media Officer, Pu David L. Thangliana chuan Serchhip biala NLUP hmalakna kal mekah Horticulture, Soil & Water Conservation Department leh Fisheries Department hnuaia hmala hlawhtling zualte a hmunah kalin an hmalak dan leh an hmachhawpte a enfiahsak a, an harsatna te pawh a ngaihthlaksak hlawm bawk a ni.

Pu David-a hian Mat phai-a Soil & Water Conservation Department-in NLUP hnuaia Rubber chin thlangtu te hnena Rubber tiak sem tur an kuitiahna hmun, Rubber Nursery chu tlawhin hemi hnu hian Chawm Kai bula Pu Darlawma Sangha dil leh Pi Khawvelthangi hmunphiah hmun te pawh a hmun ngeiah kea kalin a tlawh a ni. Chawhnu lamah Pu Rualzakhuma Tung hmun leh Pu HT. Rinkhuma Sangha Dil, New Serchhip lam a mi te pawh a tlawh leh nghal a, mi taima leh thawkrimte hlawhtlinna a taka hmutu nih chu a vanneihthlak a tih thu leh an hlawhtlinna chu chhuanawm a tih thu a sawi a ni.

Pu David-a chuan NLUP hnuaia hmalakna hrang hrangah a hlawhtlinna hmel hmuh tur a awm mek chu lawmawm a tih thu sawiin, a bik takin Pi Khawvelthangi’n hlawhtling taka hmunphiah a ching chu entawntlak a tih thu a sawi a; Pi Khawvelthangi hian a hmunphiah atang hian nikum chhung khan Rs. 1,70,500/- hmuin hmunphiah kara Thingfanghma leh thlai dang a chin atangin Rs. 60,000/- vel a hmu bawk a ni. Pi Veli chuan a hmunphiah huanah hian khua a en chhung chu a thawh reng mai thu leh a dam a nih phawt chuan a huan hi a hnim ngai loh thu a sawi a, kuminah pawh hian Hmunphiah atangin nikum a a hmuh let a hmuh ngei a beisei thu a sawi bawk a ni.

Pu David-a hi concern department-a District Officer te leh Serchhip District, Information & Public Relations Department mi leh sa ten an lo tawiawm a ni.