Vawiin chawhnu dar 1.00 khan Govt. Bethlehem Vengthlang Primary School –I chuan an school din champha-phak vawi 50-na an lawm a; Education Minister Pu Lalsawta chuan he hun hi a hmanpui a ni.

Education Minister chuan, “Mizoram-a nu leh pate leh khawtlangin Sawrkar school-te chu zirna lama chhe tura ngaia an hawisan mek laia Govt. Bethlehem Vengthlang Primary School-I in zirlai 212 ngawt mai nei a, Mizoram-a sawrkar primary school-te zinga naupang ngah ber dawttu in ni hian Education Department a chawimawi em em a ni” a ti. Pu Lalsawta chuan Mizoram sawrkar-in sum harsatna avanga school mamawhte duh anga a thuam thei lo chu pawi a tih thu a sawi rualin, “Ram mipuiten sawrkar school hi belhfakawma an ngaih leh theihna turin zirlaibu leh inzirtir dan kalphung thlak danglam tumin nasa takin tan kan la a. Kum 2013 atang chuan zirlaibu thar nen, naupangte tana lehkhazir chakawm leh hriatthiam awlsam zawnga inkaihruai theih kan inbeisei a ni” a ti. Education Minister chuan Mizo mipuiin tlin lo chung pawha English medium school-te kan bawh tak avanga Sawrkar school-te pawh English medium school-a leh mai chu ngaihtuahna peng pakhatah a awm thu a sawi a, “A tul angin mipui ngaihdante lain, committee sang zawkahte ngaihtuah tura chhawpchhuah a la ni maithei a ni” a ti bawk. Pu Lalsawta chuan Mizoram-a zirna kalphung tharah chuan zirlaite tana hriatthiam awlsam zawnga subject harsaa ngaih – mathematics te, science leh Hindi-te zirtir an nih tur thu leh eizawnna atana hman theih tura thiamna tak tak pawchhuak tura inkaihhruai chu ngaih pawimawh ber a nih tur thu pawh a sawi a ni.

Pu K. Liantlinga, MLA pawhin Golden Jubilee Souvenir tlangzarh paha thu sawiin, “Zirna that leh that loh chu zirtirtute-ah a innghat thui ber a; zirtirtute hian kan rawngbawlna hi eizawnna satliahah ngai lovin kan thawh a tul a. Zirtirtute tan chuan kan hun zawng zawng leh kan nun pum hi naupangte tan zir tur a ni reng tih kan hriat thar a pawimawh a ni” a ti.

Govt. Bethlehem Vengthlang Primary School-I hi Bethlehem Veng-a Lower Primary School hmasa ber niin, kum 1962 khan a lo ding tan a; a din tirh atangin zirlai an thahnem thei hle a; naupang 320 laite an nei thin a ni. Kum 2007 atangin SSA Mission hnuaiah Model English School 9 zinga pakhat atana thlan a ni ta a; tunah hian KG-I atanga Class IV-ah zirlai naupang 212 an awm a ni. He school hi Mizoram pum huapa mi hriat hlawh tak takte leh officer thahnem tak ten zirna bul an lo tan tawhna a ni.