Vawiin chawhnu khan Chief Minister’s Conference Hall-ah Mizoram Football Association Executive Committee Meeting neih a ni a. MFA President Pu Lal Thanzara, Health & Family Welfare Minister-in meeting hi a kaihruai a, Mizoramin football-a hlawhtlinna a neihte leh MFA hmalakna hrang hrangte ngaithlain an sawiho nghal.

Meeting kaihruaitu Pu Lal Thanzara chuan thu sawiin MFA hmalakna zara Mizoram-in football-a hlawhtlinna ropui tak tak a nei thin chu a lawmawm hle a ni, a ti a. Secretary Pu Lalnghinglova chuan tun hnaia Mizoram-in football lama hlawhtlinna a neihte report-in MFA hmachhawpte a tarlang nghal bawk. Secretary chuan Mizoramin RGKA Boys-ah pakhatna dinhmun a hauh bakah RGKA Girls leh National Junior Football Championship 2016-ah te pahnihna dinhmun a hauh tih tarlangin, North East Zone Sub Junior Football-ah pawh beisei ang thleng theilo mahse Mizo player pasarih lai chu AIIF hnuaia trial nei thei tura sawm an ni chu hlawhtlinna ropui tak a ni, a ti a.

Meeting-ah hian February 17-23, 2016 chhunga Mizoramin a thlen tur, Santosh Trophy (North East Zone), chungchang sawiho niin Organising Committee hma lak tawhnate thlirho a ni a. Hei bakah hian March 2016-a neih tur North East Games-a mipa football team tir tura inbuatsaihna pawh ngaihtuah a ni bawk. March thla atanga Serchhipa neih tan tur, MFA Cup 2016 chungchang pawh ngaihtuah niin Match Commissioner leh mawhphurtu dangte ruat fel nghal a ni a. March ni 7, 2016-a tan tur All Mizoram Inter Village Under 16 Football inpuahchahna kal mek thlirho a ni bawk.

MFA hian Mizorama football hmasawn nan TATA Trust nen thawkho turin indawrna an kalpui mek a. A hmasa berin Coach Education lama hmalak tum a ni. Hei bakah hian February ni 20 khian MFA hian FIFA Senior Development Manager for Asia, Mike Pfister leh South Asia FIFA Development Officer Dr. Shaji Prabhakaran-te nen Mizorama FIFA Project sawihona an buatsaih dawn bawk a ni.