Tukin zingkar khan Pu R. Lalzirliana, Prisons Minister chuan Lawngtlai District Jail a tlawh a, hnathawktute leh Jail tang mekte a kawm.

Minister chuan District Jaila tang mek te chu, Ram leh khawtlang duhloh zawng engemaw thil an tihpalh avanga tang an nih thu a sawi a. Amaherawh chu chutiang mi ni reng lova, khua leh tui tha, ram leh khawtlang tana mi tangkai leh mi dangte tanpuitu ni tawh zawk turin a fuih a, Jail chu nun siamthatna hmun a tana hman tum turin a chah a ni. Jail tang mekte chu ei leh in leh inenkawlna dang an dawn that tawk leh tawkloh a zawt a, tang mekte hian engkim an dawn that thu Minister hi an lo hrilh a ni. Infiamna tur Table Tennis an lo dil a, Table Tennis hi Minister tawiawmtu, Lawngtlai Bawrhsap Pu J. Hmingthanmawia chuan a ngaihtuah sak tur thu a sawi a ni.

Minister in Jail a tlawh hian Jail Superintendent Pu Zosangliana leh thawktu dangten an lo dawng sawng a, Pu Zosangliana’n report a pek danin tunah hian thawktu 22 an awm mek a, Jail tang mipa 11 an awm mek bawk.

Minister hi Parliamentary Secretary Lt. Col (Rtd) Pu ZS Zuala te, Pi Zoramthangi, IGP te, Lawngtlai DC Pu J. Hmingthanmawia te,bakah LADC a MDC leh EM engemawzatin an tawiawm a ni.