Vawiin chawhma khan Bazar veng Community Hall, Lunglei ah Fire Prevention Week 2016 hawnna neih a ni. Pu Rothuama, Addl. DC, Lunglei in inkhawm kaihruaiin Pu Abhijit Vijay Chaudhuri IAS, Deputy Commissioner, Lunglei chu khuallian a ni.
Khuallian chuan thusawiin kumtin Mizoram hmun hrang hrangah, lo hal leh kan fimkhur loh thin avangin ram thalai nasa takin a kang chhe thin a. Kumtin ram hectare 20,000 vel a kang chhe ziah thin a ni. Thing leh mau te nasa takin a chhia a, mihring nunna hial pawh kan chan thin a ni. Ram nasa taka chhe thin hi sorkar chuan pawi a ti em em a, a rang thei ang berin tihtawp a duh a ni. Chuvangin, kumdanga kan tih thin angin, kuminah pawh February ni 10 atanga ni 16 chhung hian ‘Fire Prevention Week’ kan hmang leh dawn a, mi zawng zawngin theihtawp kan chhuah theuh a ngai a ni.Thing leh mau te hi, mihring nunna atan hian a pawimawh em em a, boruak tha siamtu an ni a, chuvangin ram kang hi a pawi em em a ni. Thing pakhat damchhung hlutna (value) chu Cheng nuai 32 ang vel a ni a. Kum khatah Mizorama ramkang avanga ram kan tihchhiat chu hectare 20,000 vel a ni a, hectare khatah thing 1000 aia tam a awm a, chuvangin kumtin ram kang avanga kan tihchhiat hi a uihawm em em a, kan ven ngun leh kan enkawl uluk a ngai a ni.Sorkarin ramkang lo tura venna Dan a siam a, he Dan-ah hian VC te thuneihna sang tak pek an ni a. Lo hal turte chuan a hma ni 3 emaw ni 7 emaw talah VC te an hriattir tur a ni. Lo hal turte chuan meikawng (fireline) an siam ngei ngei tur a ni bawk.
Mizoram sorkar chuan lo hal tur zawng zawngte chu March ni 15 hmaa hal vek turin thupek a siam a, hei hi zawm vek tur a ni.Lunglei District chhunga khua zawng zawngte kangmei ven kawnga ti thate lawmman siam a ni dawn a. Pakhatna-in Rs.50,000, Pahnihna-in Rs.30,000 leh Pathumna-in Rs.20,000 an dawng dawn a ni a, hei bakah District zinga ti tha ber ten lawmman an dawng dawn a, chuvangin Lunglei District chu Pakhatna kan nih theih nan kan zavaiin theihtawp i chhuah theuh ang u a ti. Thian duh tak te u, kan khua leh ram humhalh leh ven hi kan tih tur (duty) dik tak a ni a, kan in leh ramte kang lo turin fimkhur theuh ila, tumahin nunna chan lo turin theihtawp i chhuah vek ang u. Kangmei laka kan him nan mitin fimkhur theuh turin ka chah nawn che u a ni ati bawk.
Pu Lianmawia, DFO leh member Secretary, Lunglei Fire Prevention Committee ni bawk in kangmei laka fimkhur a ngaihzia, ram kan ti kan hian nghawng tak tak a nei a, nungcha, ram a ti chereu a, tuihna a thlem phah bawk a ni a ti. Kum 2015 chhunga forest cover ram chu 88.93% a nih thu power point presentation hmangin a tarlang a ni. Kumin a thupui chu Ram tikangtu, ram hmelhma a ni.
Fire Prevention Week 2016 pual hian lunglei 3 gate atangin Bukpui thleng Awareness Rally neih a ni a, he rally ah hian Forest Dept, Fire & Emergency Services, JB College, Lunglei Govt. College, Mizoram Polytechnic NSS, MJA leh NGOs atangin mi thahnem tak an tel a ni.
