Vawiin khan Parliamentary Secretary Pu Joseph Lalhimpuia chuan Kolasib ah DEO Office sak mek leh Hmar Veng a Primary Sikul Amalgamated (chhunfin) tawh hmuna Education Department a thawkte leh zirtirtu te thlenna tur Education Rest House tur buatsaih mek te a tlawh a ni.

Pu Joseph Lalhimpuia chuan DEO office sak thar mek chu a hmuna DEO leh a thawhpuite nen enin, an la hmabak te a sawipui a. He office sak zawh nan hian sum pawh ruahman fel vek tawh anih thusawiin DEO Office thar chu tun atanga hun reilo tea hawn beisei a ni, a ti a. DEO Office a thawk staff te chu zirtirtu ten an hna ber - naupangte zirtirna lamah an rilru zawng zawng an pek leh an sen theih nan, zirtirtu te service matter chungchang reng reng zirtirtu te ti buai lo zawngin an service matter leh thil dangte tihfel sak thin turin a chah a. DEO Pu K C Lalrinmawia leh a thawhpui te hian Parliamentary Secretary hnenah hian mamawh hrang hrang te thlen in an harsatna te an sawipui a ni.

Hemi hnu hian Hmar Veng Hall bulah Primary Sikul Amalgamated (chhunfin) tawh hmunhma leh a building chu Parliamentary Secretary leh DEO leh a thawhpui te nen an en ho leh a. Parliamentary Secretary chuan Education Department hian zirtirtu leh thawktu dangte tan training hrang hrang an buatsaih thin a, thlenna chungchangah harsatna an tawk fo thin a, chuvangin helai hmun hi Education Department chuan Education Rest House atan cheih that a tum mek a ni, a ti a. Hemi atan hian ruahmanna leh hmalakna chu hun reilo te atan anih tur thu a sawi bawk a ni.