Vawiin khan Chief Secretary Conference Hall-ah Chief Secretary Pu Arvind Ray, IAS hovin NITI Aayog hnuaia Aspirational District Programme atana thlanchhuah Mamit District chungchangah meeting neih a ni a. He hunah hian Ministry of Chemicals and Fertilizers Addl. Secretary Pu Dharam Pal, IAS (Mamit District Prabhari Officer) leh department hrang hrang hotute an tel a ni.
Chief Secretary Pu Arvind Ray, IAS chuan thu sawiin NITI Aayog chuan India ram pumpuia district hnufual tihhmasawn nan district thlang chhuak turin ruahmanna a siam a, Mizoramah chuan Mamit District thlan chhuah a ni tiin hriselna, thiamna, zirna, tui supply, inkalpawhna kawng leh thil dang hrang hrangah Mamit District chuan hma a sawn ngei theih nan department hrang hrang tha taka thawhho a tul thu a sawi a ni.
Meeting-ah hian Mamit DC Pu Bhupesh Chaudhary, IAS chuan presentation a pe a. Aspirational District hnuaiah hian sector 5 awmin chungte chu-Health & Nutrition (30%), Education (30%), Agri & Allied (20%), Financial Inclusion & Skill Development (10%), Basic Infrastructure (10%) an ni a, Health & Nutrition leh Education sector hi ngaih pawimawh a ni lehzual a. Department hrang hranga hotute nen heng sector-ah hian hma lak a nih theih dan te, NGO-te nena thawhho dan tur te, tun dinhmuna harsatna hrang hrang te chipchiar taka sawiho a ni.
Aspirational District Programme hi India ram Prime Minister-in chak taka kalpui turin January 2018 khan a hawng a. India ram state 28 a district hnufual bik 115 thlan chhuah zingah Mizorama district 8 zing ami Mamit chu thlan tel a ni a. Aspirational District Programme hnuaiah hian district hnufualte kawng hrang hranga hmasawn bakah sawrkar laipui scheme Pradhan Mantri Gram Sadak Yojana (PMGSY), Pradhan Mantri Kaushal Vikas Yojana (PMKVY), Pradhan Mantri Fasal Bima Yojana (PMFBY), Mission Indradhanush leh scheme dang hrang hrang chak zawka kalpui te, sawrkar laipuia hnathawkte leh state sawrkar hnuaia hnathawkte thawhhona tha tak neih te, Aspirational district hrang hrang ten hmasawn tura inelna neih te a tel a. Programme hian India ram pum ang zawng pawhin hmasawnna lamah nghawng thui tak a neih beisei a ni a. Hmasawnna tehfung atan hian sector 5 hnuaiah indicator 49 a awm a ni.
He programme-ah hian sawrkar laipui leh state sawrkar chak taka an thawhho theih nan sawrkar laipuia hotute (Addl.Secretary leh Joint Secretary rank) mi 115 district tin vil turin ruat an ni a, heng ho hi Prabhari Officer niin Mamit District Pradbhari Officer chu Ministry of Chemicals and Fertilizers Addl. Secretary Pu Dharam Pal, IAS a ni.
Vawiin meeting-ah hian Health & Family Welfare, Planning, Agriculture, GAD, PWD, PHED, P&E, UD&PA, School Education, H&TE, AH & Vety, RD, Social Welfare, LESD&E Department hotute, Aizawl DC leh Mamit DC te an tel a ni.
