Vawiin hian Serchhip District Sanitation Task Force Committee te chu an chairman Bawrhsap Pi Sangchhin Chinzah hovin a pisaah an thukhawm a. Tun hnaia Ministry of Housing and Urban Affairs, Government of India in khawpui fai inelna (Swachh Survekshan, 2018) Result a tihchhuahah Northeast Zone ah Serchhip in 23 na a hauh phak chu lawmawm an tih thu sawiin, kumin atana District Action Plan kalpui dan tur an rel zui.

Chairman Pi Sangchhin Chinzah chuan, khawpui fai inelna (Swachh Survekshan 2018) Northeast Zone a khawpui 220 zingah Serchhip chu 23 nia, Mizoram District khawpui zinga dinhmun sang ber luahphaa a awm thei chu ropui a tih thu a sawi a. Hetianga faina lama hmasawnna nasa tak lo awm chhan hi Serchhip mipuite inpekna vang a ni, an chungah lawmthu ka sawi a, hei hi bultanna ah ngaia nasa zawka thawk zel turin thawhpuiah ka sawm a ni, a ti.

Swachh Survekshan Northeast Zone hnuaiah hian khawpui 220 zingah Mizoram khawmpui zingaah khaw 22 an lang a, an zinga titha ber chu Biate niin 2 na an ni. Mizoram District Capital zingah Serchhip chu 23 na niin District khawpui zinga thleng sang ber a ni a. 

Vawiina meeting chuan, Sanitation chungchanga District Action Plan kalpui dan tur a ngaihtuah zui a. Component hrang hrangte kalpui dan tur duangin a mawhphurtu turte ruat fel nghal an ni. Hmalakna langsar tur zingah Serchhip khawpui paltlang NH 54 sir-a side drain la awm lo chu; Task Force-in a lo ruahman tawh sa, side drain siam nana sawrkar Office tinin pawisa thawhkhawm an rawt atanga tlingkhawm Rs.1 lakh vel leh Action Plan hnuaia Side Drain Component a sum lokal te chu Side Drain thar siam nana a daihzai thei ang bera hman a rel a, hei hi YMA leh VCs te nena thawhho tur a ni ang. Khaw chhunga tuiluan kawr bawlhhlawh zualte, NSS leh Eco Club te nena tangkawpa thenfai leh tur a ni ang a, vantlang hman tur bawlhhlawh bawm za sawmnga vel dah thar tur niin, khawpui cheina leh faina lama inzirtirna Hoarding/Wall Painting engemawzat dah thar a ni ang. Lirthei atanga bawlhhlawh paih mai mai ven nan lirthei neitute (a bikin khualzin phurtute) chu an lirtheiah bawlhhlawh bawm nei vek tura ngen leh hriattir an ni ang a, awareness leh media campaign a tam thei ang ber kalpui chhunzawm zel tur miim Anganwadi naupang atanga bawlhhlawh bawm hman tangkai dan leh mahni inenkawl fai dan uar zawka inzirtir zel ni se, an ti bawk.

Hei bakah hian Chhiahtlang (Town Area) khaw bawlhhlawh paihna (dumping Ground) Tuikum luia inpaih lut chu hmun danga sawn a rel bawk a ni.