Vawiin hian NEDP hnuaia Project duan “My Project, My NEDP - Mipui Mamawh Intawm Ruahmanna (MiMIR)’ inelna chungchang inhrilhfiahna hun DC Conference Hall Serchhip ah neih a ni.

Pu Chuauhnuna, Addl. DC chuan, he Project inelna hi thluak inelna ani a, thahnem ngai taka mahni khawtlang tana ro tling tur ngaihtuah chhuah tum turin kankhawmte a chah a. Hriatreng tlak thil tha, khawtlang hmangaihna lanchhuah tirna hun remchang tak a ni, a ti.

Pu Neng Thianlal, DLAO Serchhip chuan Project tha tak siam dan tur zirtirna a pe a, khawtina Village Council te kaihhruaina hnuaiah tlawmngai pawl 3 – YMA, MUP leh MHIP atangin mi 2 theuh te nen Joint Committee siam tur a ni a.Chu Joint Committee sawi hona atang chuan MiMIR Project Concept Paper hi siam tura tih a ni. Mimal atangin Project hi dawn theih ani dawn lova, mi thahnemngai ten project an neih chuan an khaw Joint Committee hnenah thlen zawk tur ani ang. Joint Committee chuan MiMIR ruahmanna chu Form (Proposal Paper) siamsa hmangin ni 16 July, 2018 aia tlai lovah Member Secretary, SDO(Sadar) hnenah theh luh tur a ni. Heng project hrang hrang thehluh atang hian District MiMIR Committee chuan a tha zual 20 an lo thlang chhuak anga, an project sawifiahna neih tir leh an ni ang a, chuta tang chuan thlifim lehin Project tha ber hi thlan chhuah ani dawn a ni. Tichuan lawmman dawngtu khua chu an Project in a kaihhnawih sawrkar department ten Detail Project Report mumal zawk an siam sak leh ang a, hnathawhna tur Rs. Nuai 100 an dawng tawh dawn a ni.

He hun hi Pu R. Vanrengpuia, SDO(S), Member Secretary, District MiMIR Committee chuan a kaihruai a, MiMIR project inelna atanga district chhung khua/veng tina joint committee aiawh mi 2 theuhte an tel a a ni.