No.2180/2021-2022
Aizawl, the 10th September 2021 : Vawiin khan Chief Secretary Pu Lalnunmawia Chuaungo leh Addl. Chief Secretary Pu J.C. Ramthanga te hovin SAD Conference Hall MINECO ah Ministry of DoNER, NEC, NESIDS, Special Assistance to States for Capital Expenditure (SASCE) hnuaia project hrang hrang 77 kalpui mek te thlirho a ni a. Department hrang hrang hotulu te telna he meeting ah hian project thlen chin te, hmabak te leh harsatna awm te thlirho a ni bawk.

Meeting ah Chief Secretary chuan thu hmahruai sawiin Central Sawrkarin sum a thawh project kalpui mek te chu a hun taka zawhfel a pawimawh a, a hun taka kan zawh chuan a leh pekah pawh a funding agency atangin project dil a awlsam thin, a ti a. Department te chu project reng reng uluk taka vil a, harsatna awm te leh an chinfel theih loh thil a awm a ni chuan chungte chu ngawih bo pui mai lova hotulu sang zawkah leh ama hnenah pawh rang taka thlen vat thin turin a chah a ni.

Meeting ah hian Planning & Programme Implementation Secretary Pu Lalmalsawma Pachuau chuan project hrang hrang te dinhmun a tarlang a. Chief Secretary hovin Department hotulu te chuan an project thlen chin, hmabak leh harsatna awmte chu sawiin Chief Secretary zawhbelhna te an chhang a. Chief Secretary chuan a bik takin NEC project thenkhat te chu a funding a tawp tawh dawn avangin nakum March hmaa zawhfel a ni ngei theih nan Department te chu chak taka heng project te hi vil turin a hrilh a ni.

NLCPR hnuaiah project 21; NESIDS hnuaiah project 5; NEC hnuaia project 27 leh SASCE hnuaiah project 24 thawh mek niin tun thla thum kaltaah khan NLCPR hnuaia project 4, NEC hnuaia project 5 leh SASCE hnuaia project 4 te chu zawhfel a ni tawh tih meeting ah hian tarlan a ni a. North East Space Application Centre nena inthlunzawma project te vil dan tur ruahmanna kalpui mek pawh meeting ah tarlan a ni bawk.