New Economic Development Plan (NEDP) hnuaia component pawimawh tak  Entrepreneurship Development  Scheme (EDS) hmalakna a  “1st E-Summit leh Business Plan Competition” buatsaih tur ah  Mizoram  State Entrepreneurship Development Monitoring Committee (MEDMOC) leh IIM Kolkata  Innovation Park te an thawkho dawn a. Vawiin khan he thawhhona tur Official Kickoff meeting hi Chief Secretary  Pu Lalmalsawma  hovin Chief Secretary Conference Hall ah neih a ni.

NEDP hnuaia  Entrepreneurship Development Scheme hian a tum ber chu mahni kutkawih, leh ngaihtuahna hmanga Mizoram thalaite sumdawnna leh eizawnna ngelnghet dinpui a ni a. Hemi atana Entrepreneurship Summit leh Business Plan Competition buatsaih  turah hian Indian Institute of Management (IIM) Kolkata Innovation Park chu “knowledge partner” anni dawn a. He thawhhona hnuaiah hian E-Summit neih bakah Mizorama Entrepreneurs te zirtirna leh sumdawnna thar tan duh te tan intihsiakna hmanga tanpuina  leh hamthatna  dawn theihna tur a awm dawn a ni.

Kickoff meeting hi Chief Secretary Pu Lalmalsawma , MEDMOC Chairman ni bawk in a kaihruai a. IIM Kolkata Innovation Park atangin Dr. Subrangshu Sanyal, CEO leh a thawhpuite rawn telin, hna kalpui dan tur chipchiar takin an sawifiah a.  He meeting ah hian MEDMOC Committee leh Expert member te bakah MZU Innovation Club, I&PR Department, ICT Department leh EDS hnuaia Master Trainers te an tel bawka, E-Summit leh Business Plan Competition hlawhtling taka neih anih theihna tura ruahmanna siamin hmalakna tur te an sawiho a ni.