Nimin chawhnu dar 3:00 pm khan Mizoram Chief Secretay Pu Lalmalsawma chuan Government Champhai College Multipurpose Hall-ah New Economics Development Programme hnuaia Enterprenuership Development Scheme chungchang sawifiahna leh atum bulpui hrilh hriatna a nei.
He hun Champhai DC Pu Vanlalngaihsaka kaihhruaiah hian CS Pu Lalmalsawma chuan Mizoram sorkar-in New Economics Development Programme (NEDP) hnuaia Enterprenuer Development Scheme (EDS) a duang chhuak ta leh Mizo thalaite zinga mahni theihna leh remhriatna hmanga eizawnna kawng kawhhmuhna, Mizo tawnga chhiar theih tura a awm ta chu lawmawm atih thu a sawi a. He kaihhruaina hnuaia thalaiten eizawnna nghet hna an thawh theih hun chu kan ram nghahfak anih thu a tarlang tel bawk.
CS Pu Lalmalsawma chuan India ram chu Economy a thanduan viau laiin hnathar siam erawh a tlem hle tih sawiin, Sorkar hna thawh tur a tlem vang leh beisei tur a awm loh vangin zirlai tam takin school kal an chawlhsan mek a ti a. Sorkar leh ram hmasawnna thlentu leh mi chhenfakawm ni turin pianpuithiamna hmanga eizawnna nghet ngaihtuah a pawimawh thu leh hemi kawng kawhhmuhna atan hian Mizoram sorkar chuan EDS atan tun sorkar kum chhungin Rs 2 crores (Cheng vaibelchhe 2) a dah anih thu a sawi bawk.
He hunahhian Enterpreneurship Kailawn tih lehkhawbu buatsaihtu Pu Joseph L. Ralte chuan zirlai zingah mi thiam chungchuang bik 5% te chauhin sorkar-ah hna an hmuh thin thu a sawi a. Lehkhathiam sorkara in ziaklut mi 49825 awm thu leh hnahmu lo mi 47001 an awm mek thu sawiin, DP&AR kal tlangin hnalak 422 MPSC kaltlang a hnalak 92 nen mi 514 tan chauh sorkar-ah hna siam anih thu a sawi a. Tunah hian HSLC zirlai 8500, HSSLC zirlai 4500, Graduate 1300, Post Graduate 500 te tan hian sorkar-ah inhnang fakna tur a awm loh vangin mahni thiamna hmanga eizawnna nghet ngaihtuah hi tih makmawh anih thu uar takin a sawi a. Kan ram thalai tam ber tuna Liability dinhmun a ding mekte hi ram tana Asset ni tura tha leh zung senga eizawn a ngai a ti bawk.
He hunah hian zawhna leh chhanna hun hman anih bakah sawihona hun hman a niin, Champhai District a sorkar Department hotute, Govt. Champhai College zirlaite leh HSSLC zirlai thahnem tak an tel a ni.
