Minister of Finance, Law & Judicial, etc. Pu Lalsawta chuan vawiin khan ni hnih awh tur National Seminar, “Gender Equality and Sustainable Development with Special Reference to North East India” tia vuah chu Mizoram University-a Dean’s Conference Hall, SSS-ah a hawng. He National Seminar hi UGC bultum niin, Women’s Studies Centre, MZU in an buatsaih a. He hunah hian Prof. Lianzela, Acting Vice Chancellor, MZU chu khualzahawm niin, Lt. Gen. (Rtd) Dr. Anil Misra, Vice Chancellor, ICFAI University chu special guest a ni bawk. 

Khuallian chuan thu sawiin, hmeichhiate chu hmeichhia an nih vang chauhva mipa aia hnuaihnung zawk tura kan dan thin chu ngaihdan awmze neilo tak a nih thu a tarlang a. Chutiang ang ngaihdan siamtha turin leh hma kan sawn zel theih nan a seminar buatsaih a ni chu lawmawm a tih thu sawiin, chhimtute leh mipui tam zawkin an hlawkpui a beisei thu a tarlang a ni. 

Minister Pu Lalsawta chuan ram a lo than a mihringten hma an sawn telh telh chuan tharum aiin thluak leh finna in pawimawhna a nei tam zawk zel a, chumi avang chuan tunlai khawvelah mipa leh hmeichhia ten hna leh thildangah rualkhai takin hlawhtling tura theihna an nei ta tihna a ni a. Amaherawhchu kawng tam takah hmeichhiate chu hnufum zawk leh mipa tluk theilo tur anga ngaihdan la awm thin chu thil pawi tak a ni, a ti a. Tharum ah hmeichhia ten mipa tluklo zawk thin mahse kawng dangah mipa ang bawka chak leh fei an nih avangin intluktlanna dik tak siam turin hma kan la tur a ni, a ti a. Hun kal tawh ngaihtuahin kawng tam takah hmasawnna kan neih tawhte pawh hai rual a nilova, inthlahdah lova kan ngaihtuahnate hmangin kan kal zel tur a ni, tiin researcher leh zirlai kalkhawmte chu Minister chuan a chah bawk. 

Vawiin hun hi Prof. Lalneihzovi, Hony. Director, Women’s Studies Cell & HOD, Public Administration chuan hun a kaihruai a. Khualzahawm leh Special Guest atang tein leh Pi Binalakshmi Nepram, Member Secretary, Control Arms Foundation of India; Prof. Prabhat Kumar Datta, Centenary Chair, Public Administration, Kolkata University leh Dr. Nupur Tiwari, Chair, Rural Development Centre, Indian Institute of Public Administration (IIPA), New Delhi hnen atangin thusawi ngaihthlak a ni bawk. Chawhnu lam atangin technical session neih a ni a, March ni 10, 2017 thleng neih a ni ang a, Mizora leh India state hrang hrang atangin seminar chhim tur hian lo kalin, paper 34 present tur a awm  a ni.